قازاقستان بىرىنشىلىگىنە قاتىسىپ جاتقان بوكسشىلار دوپينگ باقىلاۋىنان وتەدى
بۇل تۋرالى قازاقستان بوكس فەدەراتسياسىنىڭ كەشەندى عىلىمي توبىنىڭ ۇيلەستىرۋشىسى عاليا ءبىلالوۆا ءمالىم ەتتى.
وسى جۇمىستى تىڭعىلىقتى اتقارۋ ءۇشىن دوپينگكە قارسى ۇلتتىق ورتالىق قىزمەتكەرلەرى اقتاۋعا ات باسىن بۇرعان. ولار سپورتشىلار اراسىندا ءىشىنارا تەكسەرىس جۇرگىزبەك.
دوپينگ ماسەلەسى جان-جاقتى تالقىلانعان. سەمينارعا بارلىق وبلىستاردىڭ اعا جاتتىقتىرۋشىلارى قاتىستى. ولارعا بۇكىل الەمدىك دوپينگكە قارسى اگەنتتىكتىڭ 2019-جىلدان باستاپ تىيىم سالعان پرەپاراتتار ءتىزىمى تۋرالى باياندالدى.
سونىمەن قاتار، باپكەرلەر مەن سپورتشىلارعا دوپينگتىك تەكسەرۋ كەزىندە قانداي جايتتارعا نازار اۋدارۋ كەرەكتىگى ايتىلدى. مۇنداي سەمينارلار وبلىس وكىلدەرى ءۇشىن جىل سايىن ەل بىرىنشىلىگى كەزىندە وتكىزىلىپ تۇرادى. ال ۇلتتىق قۇراما مۇشەلەرى ءار وقۋ-جاتتىعۋ كەزىندە وسى تاقىرىپتى تالقىلايدى.
«قازاقستاننىڭ بوكس فەدەراتسياسى دوپينگكە مۇلدە توزبەۋشىلىك ساياساتىن ۇستانا وتىرىپ، وبلىستار مەن اۋداندارداعى باپكەرلەر اراسىندا دا ءتۇسىندىرۋ جۇمىستارىن جۇرگىزىپ تۇرادى. كەز كەلگەن سپورتشى دوپينگ وفيتسەرلەرىنىڭ تابان استىنان بولاتىن تەكسەرۋىنە دايىن بولۋى ءتيىس. ونى ەلىمىزدىڭ نامىسىن قورعاپ جۇرگەن ءبىزدىڭ سپورتشىلار جاقسى تۇسىنەدى»، - دەيدى عاليا ءبىلالوۆا.
اۆتور: كۇنسۇلتان وتارباي