ەكس-مينيستر امالبەك تشانوۆ: ەلباسى قوڭىراۋ شالىپ، تاعى ءبىر اكىمدى ۇرعانىم تۋرالى ايتتى
ول لاۋازىمدى قىزمەتىنەن كەتكەننەن كەيىنگى ءومىرى تۋرالى ايتىپ بەردى. سونىمەن قاتار ءوزىنىڭ قاتال اكىم بولعانى تۋرالى ايتىپ ءوتتى.
بۇل تۋرالى 31- ارناعا سىلتەمە جاساپ Stan.kz حابارلايدى.
ەل اراسىندا امالبەك تشانوۆتىڭ اكىمدىك قىزمەت اتقارعان كەزىندە قاتال اكىم بولعانى تۋرالى ءسوز بار. ونىڭ قانشالىقتى راس ەكەنىن ساياساتكەردىڭ ءوزى ايتىپ بەردى.
«جالپى، جاتقان تاستىڭ استىنان سۋ اقپايدى دەيدى. ەش جۇمىس ىستەمەي، جۇرتتىڭ ىڭعايىنا قاراپ جۇرە بەرسەڭىز، ەش ۋاقىتتا سىرتىڭىزدان ءسوز ايتىلمايدى.
ءبىر كۇنى ەلباسى قوڭىراۋ شالدى. كومەكشىسى: «نۇرسۇلتان ءابىش ۇلى سىزبەن سويلەسكىسى كەلەدى»، - دەدى. ول كىسى ادەتتە جاقسى سويلەسەتىن. «امالبەك، جاعدايىڭ قالاي؟» - دەپ. مەن جاۋاپ بەردىم. سودان كەيىن: «سەن تاعى ءبىر اكىمدى ۇرىپسىڭ عوي»، - دەدى. «نۇرسۇلتان، ءابىش ۇلى، مەنىڭ كىمدى ۇرعانىمدى ءبىلۋ ءۇشىن سىزگە ۇلكەن جۇمىس كەرەك ەمەس قوي. ءبىر اۋىز تۇسىندىرەيىن. مەن كىمدى ۇرعانىمدى ءوزىم دە بىلمەيمىن. ەكىنشى جاعىنان، ءوزىڭىز بىلەسىز، مەن - بوكسشىمىن. جاي عانا ۇرمايمىن، ءولتىرىپ ۇرامىن»، - دەدىم. سودان كەيىن ول كىسى كۇلدى دە، تەلەفون تۇتقاسىن قويدى»، - دەيدى ەكس-مينيستر.
امالبەك تشانوۆ لاۋازىمدى قىزمەتىنەن كەتكەننەن كەيىن ءبىر سۇحباتىندا «باتەڭكە بايلاعىشتاردىڭ ءبارى بىرگە كەتكەنىن» ايتقان. سول ءسوزىن تۇسىندىرگەن ساياساتكەر كەزىندە 4 اي جۇمىسسىز وتىرعانىن باياندادى.
«سولاي، ول شىندىق قوي. كەزىندە مەن شىمكەنت قالاسىنداعى قىزمەتىمنەن كەتكەننەن كەيىن، 4 اي جۇمىسسىز وتىردىم. ەشكىم جوق. قوڭىراۋ شالۋعا دا قورقادى. ۇيگە دە ەشكىم كەلمەيدى. 4 اي تىنىش جاتتىم. سوندا مەن قازاق حالقىنىڭ بولمىسىن ءتۇسىندىم»، - دەيدى تشانوۆ.
ءوز سوزىندە ەكس-مينيستر ومىرىندەگى قيىن ءساتتى ەسكە الدى. ەكى قىز، ءبىر ۇلىن تاربيەلەگەن امالبەك تشانوۆ بىرنەشە جىل بۇرىن جالعىز ۇلىنان ايىرىلعان.
«جۇرەگىمدى اۋىر قىلعان ەڭ قيىن ماسەلە، ول 2003-جىلى كىشى ۇلىمنىڭ دۇنيەدەن ءوتۋى. دەنەگە تۇسكەن اۋىرلىقتى كوتەرۋگە بولادى، ءسوزدى دە كوتەرۋگە بولادى. ال جۇرەگىڭدى جارىپ شىققان، باۋىر ەتىڭنەن شىققان ۇلدىڭ دۇنيەدەن ءوتۋى مەن ءۇشىن ومىرىمدەگى ەڭ قيىن ءساتتىڭ ءبىرى بولدى»، - دەيدى امالبەك تشانوۆ.
سونىمەن قاتار امالبەك تشانوۆ بۇگىندە رەسپۋبليكالىق سپورت كوللەدجىنىڭ ديرەكتورى رەتىندە ءبىرقاتار جۇمىس اتقارىپ وتىرعانىن ايتتى. ءوزىمنىڭ كوڭىلىمنەن شىعاتىن قىزمەت ماعان وتە قىمبات، دەيدى ول.