تۋريستەر ءۇشىن ەڭ قاۋىپسىز ەلدەردىڭ ءتىزىمى جاسالدى

استانا. قازاقپارات - ساراپشىلار تابيعي اپاتتار، دەنساۋلىققا قاۋىپتى جانە قىلمىس پەن تەرروريستىك شابۋىلدار سەكىلدى جاعدايلار بويىنشا تۋريستەر ءۇشىن ەڭ قاۋىپسىز ەلدەردىڭ ءتىزىمىن جاسادى.

تاياۋ شىعىس پەن سولتۇستىك افريكا ەلدەرى تانىمال دەمالىس ورىندارىنا قاراعاندا تۋريستەر ءۇشىن قاۋىپسىز بولىپ شىقتى، دەپ حابارلايدى Turizm.

 دەگەنمەن ەڭ قاۋىپسىز ەل رەتىندە يسلانديا كوش باسىندا. اتلانت مۇحيتىنىڭ سولتۇستىگىندە ورنالاسقان بۇل مەملەكەتتە قىلمىستىڭ دەڭگەيى وتە تومەن. 2000 -جىلدان بەرى يسلانديادا قىلمىسكەرلەردىڭ قولىنان 36 ادام عانا قازا بولعان، ياعني جىلىنا ورتا ەسەپپەن ەكى ادام. سونىمەن قاتار بىرىككەن اراب امىرلىگى، سينگاپۋر جانە يسپانيا ەڭ قاۋىپسىز تۋريستىك ەلدەر تىزىمىنە جايعاسقان. ولاردىڭ ارتىندا اۆستراليا، كانادا جانە جاپونيا تۇر.

 ال قىلمىستىڭ ەڭ جوعارى دەڭگەيى وڭتۇستىك افريكا، تۇركيا، تايلاند، ءۇندىستان مەن مەكسيكادا بايقالعان. يوردانياداعى قىلمىستىڭ دەڭگەيى فرانسيا، يتاليا، ا ق ش جانە تايلاند ەلدەرىنە قاراعاندا تومەن بولىپ شىقتى. ءبىر قىزىعى، افريكانىڭ سولتۇستىگىندەگى ماروككودا ەۋروپا مەن امەريكا قۇراما شتاتتارىمەن سالىستىرعاندا قىلمىس از جاسالاتىن كورىنەدى. جانە بۇل دەرەكتەر وتكەن جىلى جاريالانعان International SOS حالىقارالىق ۇيىمىنىڭ قاۋىپسىزدىك رەيتينگىسىنە سايكەس كەلەدى.

www.24.kz