ترامپ پەن تەلەارنا جۋرناليسى اق ءۇيدە وتكەن باسپا ءسوز ءماسليحاتى كەزىندە ۇرسىسىپ قالدى
دجيم اكوستا 7 - قاراشا كۇنى كونگرەسسكە ارالىق سايلاۋ قورىتىندىسى بويىنشا وتكەن باسپا ءسوز ءماسليحاتى كەزىندە ترامپتىڭ نەلىكتەن سايلاۋالدى سوزىندە ميگرانتتاردى «جاۋلاپ الۋشىلار» دەپ اتاعانىن سۇراعان. CNN جۋرناليسى سونىمەن بىرگە «ترامپ رەسەيمەن بايلانىسى بار دەگەن ىستەن قاۋىپتەنبەيدى ما؟» دەگەن سۇراق قويعان.
ترامپ اكوستا سۇراقتارىنا جاۋاپ بەرۋدەن باس تارتىپ، ونى «دورەكى ءارى جيىركەنىشتى ادام» دەپ اتاعان. وسىدان كەيىن CNN ءتىلشىسىنىڭ اق ۇيگە كىرۋىنە تىيىم سالىنعان. اق ءۇي باسپا ءسوز حاتشىسى سارا ساندەرس جۋرناليستى «ەرسى قىلىق كورسەتتى» دەپ ايىپتاعان. ونىڭ ايتۋىنشا، اكوستا ءىس تاجىريبەسىنەن ءوتۋشى قىزدىڭ قولىنان ميكروفوندى الىپ الماق بولعان.
الەۋمەتتىك جەلىدە جاريالانعان وقيعا ۆيدەوسىن قولدانۋشىلار مەن ب ا ق «قولدان جاسالعان» دەپ، اق ءۇيدى ايىپتادى. CNN ترامپقا قارسى شاعىمىندا جاۋاپ بەرۋشى دەپ قوسىمشا بەس ادامدى كورسەتكەن. ولار - اق ءۇي اپپاراتىنىڭ باسشىسى دجون كەللي، باسپا ءسوز حاتشىسى سارا ساندەرس، كوممۋنيكاتسيا جونىندەگى شتاب باسشىسىنىڭ ورىنباسارى بيلل شين، قۇپيا قىزمەت ديرەكتورى دجوزەف كلانسي مەن مەكەمە وفيتسەرى دجون دوۋ.
CNN دجيم اكوستاعا اككرەديتاتسياسىن قايتارىپ بەرۋىن تالاپ ەتەدى. تەلەارنا سوتقا ءتۇسىرىپ وتىرعان شاعىم تەك تىلشىگە بايلانىستى ەمەس ەكەنىن ايتىپ، مۇنداي جاعداي قىزمەتكە سايلاۋ ارقىلى يە بولعان شەنەۋنىكتەر جايىندا سۇراق قويعان كەز كەلگەن جۋرناليستىڭ باسىنا ءتۇسۋى مۇمكىن ەكەنىن ەسكەرتەدى.
2017 -جىلدىڭ باسىندا ترامپ پرەزيدەنت قىزمەتىنە كىرىسەر الدىنداعى باسپا ءسوز ءماسليحاتى كەزىندە CNN ءتىلشىسىنىڭ سۇراقتارىنا جاۋاپ بەرۋدەن باس تارتىپ، تەلەارنانى «جالعان اقپارات تاراتادى» دەپ سوككەن. CNN باسشىلىعى ول كەزدە پرەزيدەنت ارەكەتىن ايىپتاپ، جۋرناليسىنە قولداۋ كورسەتكەن.
www.azattyq.org