انگەلا مەركەل ەۋروپانىڭ ءوز ارمياسىن قۇرۋعا شاقىردى
«ەۋروپا كۇشتى بولعاندا عانا ءوز قۇندىلىقتارىن قورعاي الادى. ءبىز ءوز تاعدىرىمىزدى ءوز قولىمىزعا الۋىمىز كەرەك» دەدى مەركەل.
بۇعان دەيىن فرانسيا پرەزيدەنتى ەممانۋەل ماكرون Europe-1 راديوسىنىڭ ەفيرىنەن ەۋروپانىڭ ءوزىن رەسەي، قىتاي، ءتىپتى ا ق ش- تان قورعايتىن ارمياسى بولۋى كەرەگىن مالىمدەگەن. «ءبىز ءوزىمىزدى قىتاي، رەسەي، ءتىپتى ا ق ش- تان قورعاۋىمىز كەرەك» دەگەن ماكرون.
ا ق ش پرەزيدەنتى دونالد ترامپ وتكەن اپتادا ەممانۋەل ماكروننىڭ بۇل ۇسىنىسىنا شامدانعان. ول «ەۋروپا الدىمەن ناتو شىعىنىن كوتەرۋگە ۇلەس قوسسىن، شىعىننىڭ باسىم بولىگىن ا ق ش كوتەرىپ وتىر» دەپ مالىمدەگەن.
ترامپ 13 - قاراشادا ەۋروپانى قىتاي، رەسەي جانە ا ق ش- تان قورعاعان ارميا - ءبىرىنشى جانە ەكىنشى دۇنيەجۇزىلىك سوعىس كەزىندە گەرمانيا ارمياسى بولعانىن مالىمدەدى. «مۇنىڭ سوڭى فرانسيانى نەگە اكەلىپ سوقتىردى؟» دەپ جازدى ترامپ Twitter- دە.
www.azattyq.org