ۇلتتار ليگاسى: ەكىنشى ورىن كىمگە بۇيىرماق
اتالمىش باسەكەدە د ليگاسىنىڭ ءبىرىنشى توبىندا سىنعا تۇسەتىن قازاقستان قۇراماسى ءوز الاڭىندا لاتۆيانى قابىلدايدى، دەپ حابارلايدى قازاقپارات ءتىلشىسى.
ءبىزدىڭ قۇراما كەلەسى جولى دا د ليگاسىندا باق سىنايتىنىن بىلەمىز. ويتكەنى، ءبىزدىڭ توپتان جارىستى جالعاستىرۋ مۇمكىندىگىنە گرۋزيا فۋتبولشىلارى ەكى تۋر بۇرىن قول جەتكىزىپ قويدى. سوندىقتان ەندى ءبىزدىڭ ءوز توبىمىزدا كەم دەگەندە ەكىنشى ورىن الۋ ءۇشىن بۇگىنگى ويىندا جەڭىسكە جەتۋىمىز وتە ماڭىزدى. ەكىنشى ورىن قازاقستان مەن لاتۆيانىڭ بىرىنە بۇيىرۋى مۇمكىن. بۇگىنگى كەزدەسۋدە سول ساۋالدىڭ جاۋابىن شەشىلەدى. سەبەبى، قاي قۇراما جەڭىسكە جەتسە، سول ەكىنشى ورىنعا جايعاسادى. ال قازاقستان كەلەسى تۋردا گرۋزيامەن، لاتۆيا اندوررامەن سىرت الاڭدا كەزدەسەدى. قىسقاسى، بىزدەن گورى لاتۆياعا ۇپاي قورىن تولىقتىرۋعا مۇمكىندىك زور.
ەكى قۇراما 13- قازاندا لاتۆيادا ءبىر ويىن وتكىزدى. بۇل كەزدەسۋدە ولار 1:1 ەسەبىن قاناعات تۇتتى. ودان كەيىن ءبىزدىڭ جىگىتتەر ءوز الاڭىندا اندوررانى 4:0 ەسەبىمەن ويسىراتا جەڭدى. ال لاتۆيا ءوز الاڭىندا گرۋزيادان 0:3 ەسەبىمەن ءسۇرىندى.
قازاقستان قۇراماسى لاتۆيامەن ويىننىڭ الدىندا ءبىرقاتار فۋتبولشىلار كومەگىنە جۇگىنە المايتىن بولدى. سولاردىڭ ءبىرى - رەسەيدىڭ «ۋفا» كومانداسىنىڭ جارتىلاي قورعاۋشىسى ەركەبۇلان سەيداحمەت جاراقاتتانىپ قالدى. سونداي-اق، ەۆگەني پوستنيكوۆ، دميتري شومكو، يان ۆوروگوۆسكي دە اتالمىش ماتچقا قاتىسپايدى. ولاردىڭ ورنىنا يۋري پەرتسۋح، ورالحان ومىرتايەۆ جانە يۆان انتيپوۆ شاقىرىلدى.
لاتۆيا قۇراماسىنىڭ باس باپكەرى ميكسۋ پااتەلاينەن الداعى ويىنعا دايىندىق بارىسى جايىندا ايتىپ ءوتتى. ول ءبىزدىڭ جىگىتتەر وتە جىلدام قيمىل كورسەتە الاتىنىنا نازار اۋداردى. سوندىقتان الداعى كەزدەسۋدە تارتىستى باسەكە وربيتىنىنە ءۇمىت ارتتى.
ەكى كوماندا بۇعان دەيىن التى مارتە شەبەرلىك بايقاسقان. قازاقستان 2016-جىلى 13- قازاندا ەۋروپا بىرىنشىلىگىنە ىرىكتەۋ كەزەڭىندە سىرت الاڭدا اتالمىش قارسىلاسىن 1:0 ەسەبىمەن تىزە بۇكتىرىپ قايتتى. لاتىشتار 2002، 2004-جىلداردا جولداستىق كەزدەسۋلەردە ءبىزدىڭ قۇرامانى جەڭدى. قۋانىشتىسى، سوڭعى ءتورت كەزدەسۋدە ءبىزدىڭ قۇراما ولارعا ەسە جىبەرىپ كورگەن جوق. سول سەبەپتى بۇگىن ءبىزدىڭ جىگىتتەر جانكۇيەر قاۋىمعا قۋانىش سىيلايدى دەگەن ۇمىتتەمىز.
قازاقستان مەن لاتۆيا قۇرامالارى اراسىنداعى كەزدەسۋ استانا ۋاقىتىمەن 21:00 دە باستالادى. ويىن تىكەلەي ەفيردە «Qazsport» تەلەارناسىنان كورسەتىلەدى.