تۇركىستان وبلىسىنىڭ اكىمى كوشباسشى جاستارمەن كەزدەسۋ وتكىزدى

شىمكەنت. قازاقپارات - تۇركىستان وبلىسىنىڭ اكىمى جانسەيىت تۇيمەبايەۆ ەلىمىزدىڭ كوشباسشى جاستارىمەن بەيرەسمي كەزدەسۋ وتكىزدى.

باس قوسۋدا ايماق باسشىسى جاستاردىڭ وي-پىكىرىن تىڭداپ، ساۋالدارىنا جاۋاپ بەردى، دەپ حابارلايدى قازاقپارات ءتىلشىسى.

وڭىردەگى جاستاردىڭ جەتكەن جەتىستىكتەرى مەن شەشۋدى قاجەت ەتەتىن تۇيىتكىلدەر اڭگىمە ارقاۋىنا اينالعان باس قوسۋدا جانسەيىت تۇيمەبايەۆ جاس بۋىن وكىلدەرىن ەلدىڭ دامۋىنا ءوز ۇلەسىن قوسىپ، بەلگىلى-ءبىر ىسپەن اينالىسۋعا شاقىردى. جاساندىلىقتان اۋلاق ءجۇرىپ، ءۇش تىلدە ءبىلىم الۋ قاجەتتىگىن اتاپ ءوتتى. ءوزىنىڭ ستۋدەنتتىك كەزىن ەسكە العان اكىم جاقسى ادەتتەرگە سول جاستىق شاقتان بەيىم بولۋ كەرەكتىگىنە توقتالدى. ال، كەلەر جىلى تۇركىستاندا ءىرى كولەمدى حالىقارالىق ءىس-شارالار وتەتىنىن اتاپ ءوتتى.

«ەلباسى نۇرسۇلتان نازاربايەۆ حالىققا ارناعان جولداۋىندا 2019-جىلدى «جاستار جىلى» دەپ جاريالادى. قازىرگى تاڭدا جاستار جىلىن وتكىزۋ جونىندەگى ەل ۇكىمەتى جول كارتاسىن ازىرلەۋدە. بۇل جوباعا تۇركىستان قالاسىندا وتەتىن ءىرى كولەمدى حالىقارالىق ءىس-شارالار ەنگىزىلۋدە. ماسەلەن، كەلەر جىلى ورتالىق ازيا ەلدەرى جاستارىنىڭ فورۋمى، تۇركى تىلدەس مەملەكەتتەر جاستارىنىڭ كونگرەسى ۇيىمداستىرىلماق. سونداي-اق وبلىستاعى ءار اۋداننىڭ بەلسەندى جاستارى اي سايىن «تۇركىستانعا تارتۋ» اتتى شىعارماشىلىق شارالار وتكىزىلمەك»، - دەدى جانسەيىت تۇيمەبايەۆ.

جيىندا ءوڭىردىڭ بەلسەندى جاستارى مەن قىرعىزستان رەسپۋبليكاسىنان كەلگەن ستۋدەنتتەر ءسوز سويلەپ، زامانداستارىنا جان-جاقتى جاعدايلار جاسالىپ جاتقانىنا العىس ءبىلدىردى. ماسەلەن، «قازاقستاننىڭ 100 جاڭا ەسىمى» جوباسىنىڭ جەڭىمپازى، دۇنيەجۇزىلىك توعىزقۇمالاق فەدەراتسياسى سپورتشىلارىنىڭ جەتەكشىسى، توعىزقۇمالاقتان الەمنىڭ 7 دۇركىن چەمپيونى اسەل داليەۆا جەتكەن جەتىستىكتەرىن جاستارعا كورسەتىلگەن قولداۋمەن بايلانىستىرادى.

«قازىرگى تاڭدا ءوڭىرىمىزدىڭ جاستارى ءتۇرلى سالالارداعى بايقاۋلار مەن سايىستاردا بيىك بەلەستەردى باعىندىرىپ ءجۇر. بۇل رەتتە، جاستارعا جاسالىپ جاتقان قولداۋدىڭ ماڭىزى وراسان زور. بۇگىندە جاتىقتىرۋشىنىڭ دا قىزمەتىن قوسا اتقارۋدامىن. مۇنىڭ بارلىعى ءسىزدىڭ بىزدەرگە دەگەن سەنىمىڭىز، جاس سپورتشىلاردىڭ بويىنا ارتىلعان ۇلكەن ءۇمىت. وبلىس ورتالىعىنىڭ تۇركىستان قالاسىنا اۋىسۋى توعىز قۇمالاق سپورت ءتۇرىنىڭ ودان ارى جاندانۋىنا مۇمكىندىك بەرەتىنىن ايتقىم كەلەدى»، - دەدى اسەل داليەۆا.

جيىنعا قاتىسقان جاستار، سونداي-اق قازىرگى تاڭدا وزدەرىن قانداي ماسەلەلەر مازالاپ وتىرعانىن جەتكىزدى.

ايتا كەتەيىك، تۇركىستان قالاسىندا باستالعان جاستار فورۋمى «تەرەڭ تاريحتان - جارقىن بولاشاققا!» اتتى رەسپۋبليكالىق پىكىرسايىس تۋرنيرىمەن باستاۋ الدى. سونداي-اق فورۋم قاتىسۋشىلارى تۇركىستان قالاسىنداعى «قوجا احمەت ياساۋي» كەسەنەسى، ساۋران قالاشىعى جانە وتىرار اۋدانىنداعى «ارىستان باب» كەسەنەسى، «رۋحانيات ءابۋ-ناسىر ءال-فارابي» مۇراجايى، «كونە وتىرار توبە» قالاشىعىن ارالاپ، تاريحىمەن تانىسادى دەپ كۇتىلۋدە.

بۇدان بولەك، فورۋم اياسىندا جاستارعا ارنالعان «IntellectGAME» زياتكەرلىك ويىندارى جانە حالىقارالىق «جايدارمان» سايىسى وتكىزىلمەك. وعان قىرعىستان، وزبەكستان، باشقۇرستان، تاتارستان، تۇرىكمەنستان، تۇركيا رەسپۋبليكالارىنىڭ قۇراما كوماندالارى جانە ەلىمىزدىڭ ازىلكەشتەرى قاتىسادى دەپ جوسپارلانعان.