قازاقستاندىق گرەك-ريمشىلەر الەم چەمپيوناتىنىڭ جۇلدەگەرى اتاندى
72 كەلى سالماقتا ونەر كورسەتەتىن ق. قيسمەتوۆ جارتىلاي فينالدا گرۋزيالىق بالۋانعا 5:7 ەسەبىمەن ەسە جىبەردى. ەسەسىنە، قولا جۇلدە ءۇشىن باسەكەدە رەسەيلىك قارسىلاسىن 5:0 ەسەبىمەن ايقىن باسىمدىلىقپەن ۇتتى.
ق. قيسمەتوۆ 1997-جىلى باتىس قازاقستان وبلىسى قازتالوۆ اۋدانى اقپاتەر اۋىلىندا دۇنيەگە كەلگەن. ورال قالاسىنداعى سپورتقا دارىندى بالالارعا ارنالعان مامانداندىرىلعان مەكتەپ-ينتەرناتىنىڭ تۇلەگى. كەيىن الماتىعا قونىس اۋدارعان. قازىرگى كەزدە اتىراۋ وبلىسىنىڭ اتىنان شىعىپ جۇرگەن بالۋان 2015-جىلى جاستار اراسىندا الەم چەمپيوناتىنىڭ كۇمىس جۇلدەگەرى، جاستار اراسىندا ازيا بىرىنشىلىگىنىڭ جەڭىمپازى، 2017-جىلى ەرەسەكتەر اراسىندا ق ر چەمپيونى اتانىپ ۇلگەردى.
سولتۇستىك قازاقستان وبلىسىنىڭ وكىلى، 23 جاسار امانعالي بەكبولاتوۆ بۋحارەستە 55 كەلى سالماقتا كىلەمگە شىقتى. ول جارىس بارىسىندا ءۇندىستاندىق جانە ۋكراينالىق قارسىلاستارىن شاڭ قاپتىرعانىمەن، جارتىلاي فينالدا رەسەيلىكتەن جەڭىلىپ قالدى. ەسەسىنە قولا جۇلدە ءۇشىن كۇرەستە جاپونيالىق بالۋاندى 8:0 ەسەبىمەن ويسىراتا ۇتتى.
ايتا كەتەيىك، كۇرەس تۇرلەرىنەن 23 جاسقا دەيىنگى سپورتشىلار اراسىندا بۋحارەستە ءوتىپ جاتقان الەم چەمپيوناتى 18- قاراشا كۇنى مارەگە جەتەدى.