ەلباسى روبوتتالعان حيرۋرگيانىڭ ورتالىعىنا باردى
مەملەكەت باسشىسى نەگىزگى مىندەتى روبوتتالعان حيرۋرگيانى قۇرۋ، دامىتۋ جانە ونى پراكتيكالىق مەديتسينا سالاسىنا ەنگىزۋ بولىپ سانالاتىن ورتالىقتىڭ جۇمىسىمەن تانىستى.
نۇرسۇلتان نازاربايەۆ مەديتسينادا يننوۆاتسيالىق شەشىمدەردى قولدانۋدىڭ ماڭىزدىلىعىنا توقتالىپ، روبوتتالعان حيرۋرگيا ورتالىعىندا جاسالاتىن وتالاردىڭ بۇكىل ءوڭىر ءۇشىن بىرەگەيلىگىن اتاپ ءوتتى.
«مۇنداي ۇلكەن باستاما حالقىمىزدىڭ يگىلىگىنە باعىتتالعان. مەديتسينا سالاسىن روبوتتاندىرۋ ماماندارىمىزدىڭ بىلىكتىلىگىن ارتتىرۋعا سەپتىگىن تيگىزەدى. وسىنداي ورتالىقتىڭ اشىلۋى - وتاندىق دەنساۋلىق ساقتاۋ سالاسىنداعى ماڭىزدى وقيعا. بۇل كوپتەگەن ادامداردىڭ ءومىرىن ساقتاپ قالۋعا مۇمكىندىك بەرەدى» ، - دەدى قازاقستان پرەزيدەنتى.
ەلباسى ورتالىقتا ەم قابىلداۋشىلارمەن اڭگىمەلەسىپ، پرەزيدەنتتىڭ ءىس باسقارماسى مەديتسينا ورتالىعىنىڭ جالپى جۇمىسى جانە ونى دامىتۋ پەرسپەكتيۆالارى جونىندە مالىمەت الدى.
قازاقستان رەسپۋبليكاسىنىڭ تۇڭعىش پرەزيدەنتى قورىنىڭ قولداۋىمەن قۇرىلعان روبوتتالعان حيرۋرگيا ورتالىعى مەديتسينا ماماندارىن دايارلاپ، ولاردىڭ بىلىكتىلىگىن ارتتىرۋدى قامتاماسىز ەتەتىن بولادى. سونداي- اق كلينيكالىق سىناقتار وتكىزىپ، الەمدىك دەڭگەيدەگى زاماناۋي روبوتتالعان تەحنولوگيالاردى قولدانا وتىرىپ، عىلىمي ازىرلەمەلەر دايىندايدى.