ۇكىمەتتىڭ ەكونوميكاعا قاتىسۋىن ازايتۋ كەرەك - ەلباسى

استانا. قازاقپارات - «قاز اتوم ونەركاسىپ» اكسيالارى «استانا» حالىقارالىق قارجى ورتالىعى بيرجاسىندا ساتىلىمعا شىعارىلدى، دەپ حابارلايدى قازاقپارات ءتىلشىسى.

«قازاقستان بۇگىندە تاعى دا ءبىر كەڭ اۋقىمدى جەكەشەلەندىرۋ جۇرگىزۋگە شەشىم قابىلدادى. تاۋەلسىزدىكتىڭ العاشقى جىلدارىندا، 1995-1999-جىلدارى ءبىز بارىنشا جىلدام جەكەشەلەندىرۋ وتكىزدىك. ءدال سونىڭ ارقاسىندا تولىقتاي تۇرالاپ قالعان ەكونوميكامىزدى جىلجىتىپ، داعدارىستان شىعا باستادىق. سودان بەرى كوپ ۋاقىت ءوتتى. ەندىگى ءبىزدىڭ ماقساتىمىز - ۇكىمەتتىڭ ەكونوميكاعا قاتىسۋىن ازايتۋ جانە ۇكىمەتتىڭ ەكونوميكانىڭ 15 پايىزدان اسپايتىن بولىگىن عانا باسقارۋىنا جول بەرۋ. سوندىقتان جەكەشەلەندىرۋدىڭ ۇلكەن ەكىنشى كەزەڭىن باستادىق. ونىڭ تارماقتارىنىڭ ءبىرىن ورىنداۋعا بۇگىن كىرىسەمىز. قازاقستان الەمدە مۇناي ءوندىرۋ بويىنشا ءبىرىنشى ورىنعا يە. الەمدىك ۋران نارىعىنىڭ 20 پايىزى دا قازاقستان ۇلەسىندە. سوندىقتان الەمدە بۇل كومپانيانىڭ اكتسياسىنا قىزىعۋشىلىق زور جانە تەك وسە بەرەتىن بولادى»، - دەدى نۇرسۇلتان نازاربايەۆ ا ح ق و بيرجاسىنىڭ العاشقى ساۋدا-ساتتىعىن ىسكە قوسۋ شاراسىندا.

مەملەكەت باسشىسى الداعى ۋاقىتتا ا ح ق و بيرجاسىنا «قازاق تەلەكوم»، «ەير استانا»، «قاز مۇناي گاز» سىندى ۇلتتىق كومپانيالاردىڭ اكتسيالارى شىعارىلاتىندىعىن ايتتى.

«ا ح ق و شەتەل كاپيتالىن تارتۋدىڭ كاتاليزاتورىنا اينالۋى جانە قور نارىعىن دامۋدىڭ جاڭا دەڭگەيىنە شىعارۋى ءتيىس. بۇل جەردە الەمدىك ۇزدىك تاجىريبە پايدالانىلىپ، جەتەكشى سەرىكتەستەر مەن ساراپشىلار تارتىلعان. قاتىسۋشىلار ءۇشىن وتە قولايدى شارتتار جاسالعان. قازاقستاندىق اۆياتسيا الەمنىڭ وزگە دە قارجى ورتالىقتارىنا جاڭا اۋە جولدارىن توسەيتىن بولادى»، - دەدى ەلباسى.

ايتا كەتەيىك، بۇگىن ا ح ق و بيرجاسىندا «قاز اتوم ونەركاسىپ» كومپانياسىنىڭ جاي اكسيالارىن شارتسىز ساتۋ، سونىمەن قاتار جاھاندىق دەپوزيتارلىق قولحاتتارىن شارتتى ساتۋ باستالدى. ال كومپانيانىڭ جاھاندىق دەپوزيتارلىق قولحاتتارىن شارتسىز ساتۋ بولجامعا سايكەس وسى جىلدىڭ 19- قاراشاسىندا باستالادى.

بۇعان دەيىن ەلباسى نۇرسۇلتان نازاربايەۆ «استانا» حالىقارالىق قارجى ورتالىعى بيرجاسىنىڭ العاشقى ساۋدا-ساتتىعىن ىسكە قوسقانىن حابارلاعان ەدىك.