استاناداعى حالىقارالىق قارجى ورتالىعى ءوڭىردىڭ باستى قارجى حابىنا اينالادى - نازاربايەۆ

استانا. قازاقپارات - «استانا» حالىقارالىق قارجى ورتالىعى ءوڭىردىڭ باستى قارجى حابىنا اينالادى. بۇل تۋرالى بۇگىن اتالعان ورتالىق بيرجاسىنىڭ العاشقى ساۋدا- ساتتىعىن ىسكە قوسۋ شاراسىندا ەلباسى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.

 «وتكەن جىلى ءبىز ەكسپو-2017- ءنى تابىستى وتكىزدىك. الەمدىك قوعامداستىق ءبىزدى قولدادى جانە جاڭا ەنەرگەتيكا تاقىرىبى ەنەرگەتيكانى دامىتۋداعى جاڭا سوزگە اينالعاندىعى اتالىپ ءوتىلدى. سالىنعان عيماراتتاردىڭ بازاسىندا ءورشىل حالىقارالىق قارجى ورتالىعىن سالايىق دەپ شەشتىك. بۇل تۇرعىدا ۇلكەن كۇدىك تە بولدى. دەگەنمەن، وسى ورتالىققا تاعايىنداعاندارىم جانە ۇكىمەت جاقسى قىزمەت اتقارىپ، بۇگىندە ءدال وسى جەردە «استانا» حالىقارالىق قارجى ورتالىعى جۇمىس ىستەيدى دەپ ايتا الامىز. ول ءۇشىن وزگە دە قارجى ورتالىقتاردىڭ تاجىريبەسىن زەردەلەدىك جانە بىزگە جاقىنداۋ دۋباي تاجىريبەسىنە توقتالدىق. بۇل جەردە اعىلشىن ءتىلى مەن اعىلشىن قۇقىعى بەكىتىلگەن. مەن سۋديالاردى بەكىتتىم، ولار بيزنەسمەندەردىڭ بارلىق شاعىمدارىن بارىنشا تاۋەلسىز قارايتىن بولادى»، - دەدى نۇرسۇلتان نازاربايەۆ.

قازاقستان پرەزيدەنتى كەلەشەكتە ا ح ق و ءوڭىردىڭ باستى قارجى حابىنا اينالىپ، ازيانىڭ جەتەكشى ورتالىقتارىنىڭ قاتارىنا قوسىلۋى تيىستىگىن باسا ايتتى. مۇنان بولەك، ورتالىق ازيانىڭ بارلىق ەلدەرى اتالعان ورتالىقتىڭ قىزمەتىن پايدالانا الاتىندىعىن اتاپ ءوتتى.

«قازىردىڭ وزىندە ورتالىق استاناعا قارجى ەلورداسى دەگەن جاڭا اتاۋ بەردى. جاھاندىق قارجى ورتالىقتارى رەيتينگىندە قالا سوڭعى جىلدىڭ ىشىندە 27 ساتىعا كوتەرىلدى. استانا مۇنان ارى دا ازاماتتارىمىز بەن ەلوردا قوناقتارىنا بارىنشا جايلى جاعداي جاسايتىن «اقىلدى قالا» رەتىندە دامي بەرەتىن بولادى»، - دەدى ەلباسى.

بۇعان دەيىن ەلباسى نۇرسۇلتان نازاربايەۆ «استانا» حالىقارالىق قارجى ورتالىعى بيرجاسىنىڭ العاشقى ساۋدا- ساتتىعىن ىسكە قوسقانىن حابارلاعان ەدىك.