نۇرسۇلتان نازاربايەۆ گونگ سوقتى، بيرجا ساۋدا-ساتتىعى باستالدى

استانا. قازاقپارات - ەلباسى نۇرسۇلتان نازاربايەۆتىڭ قاتىسۋىمەن «استانا» حالىقارالىق قارجى ورتالىعى بيرجاسىنىڭ العاشقى ساۋدا-ساتتىعىن ىسكە قوستى، دەپ حابارلايدى قازاقپارات ءتىلشىسى.

«بۇگىن «استانا» حالىقارالىق قارجى ورتالىعى بيرجاسىندا ساۋدا-ساتتىقتى رەسمي تۇردە باستاعالى وتىرمىز. وسى وقيعانىڭ ۇلتتىق ۆاليۋتامىزدىڭ، وسىدان 25 جىل بۇرىن ەنگىزگەن تەڭگەمىزدىڭ 25 جىلدىق مەرەيتويى قارساڭىندا ءوتىپ وتىرعانىنىڭ ماڭىزى بار. 25 جىل بۇرىن تەڭگەمىزدى ەنگىزىپ، قازاقستاننىڭ ناعىز ەكونوميكالىق قارجى تاۋەلسىزدىگىن ورنىقتىرعان بولاتىنبىز»، - دەدى شارا بارىسىندا قازاقستان پرەزيدەنتى.

سونىمەن قاتار مەملەكەت باسشىسى بۇگىندە قازاقستاننىڭ التىن-ۆاليۋتا قورى 90 ميلليارد دوللارعا جەتكەنىن، ەكونوميكامىزدىڭ ورنىقتى دامىپ كەلە جاتقانىن باسا ايتتى.

«ەرتەرەكتە ءبىز تەلەارنالاردان Wall Street-تەگى جۇگىرتپە جولداردى كورۋشى ەدىك. ەندى مىنە ول قازاقستانعا دا كەلىپ جەتتى جانە ۇيدە وتىرىپ-اق ونى بايقايتىن بولامىز. مەن «استانا» حالىقارالىق قارجى ورتالىعى بيرجاسىنداعى العاشقى ساۋدا-ساتتىقتى اشىق دەپ جاريالايمىن. بارلىقتارىڭىزدى وسىناۋ اتاۋلى كۇنمەن قۇتتىقتايمىن. جۇمىسىمىزدا مۇنان ارى دا زور تابىستار تىلەيمىن»، - دەپ اتاپ وتكەن ەلباسى ارنايى ورناتىلعان گونگ سوعىپ، بيرجانىڭ جۇمىسىن ىسكە قوستى.

ايتا كەتسەك، 2015-جىلعى جەلتوقساندا قازاقستان پرەزيدەنتى نۇرسۇلتان نازاربايەۆ «استانا» حالىقارالىق قارجى ورتالىعىن قۇرۋ تۋرالى كونستيتۋتسيالىق زاڭعا قول قويدى. ا  ح ق و- نىڭ ماقساتى - قارجىلىق قىزمەتتەردى كورسەتەتىن حالىقارالىق دەڭگەيدەگى جەتەكشى ورتالىق قالىپتاستىرۋ. پوستكەڭەستىك كەڭىستىكتە تۇڭعىش رەت اعىلشىن قۇقىعىنىڭ قاعيداتتارى ەنگىزىلەدى، قارجى ورتالىعىنىڭ رەسمي ءتىلى - اعىلشىن ءتىلى بولادى.

تاۋەلسىز سوت، حالىقارالىق اربيتراجدى ورتالىق تاراپتاردىڭ قۇقىقتارىنىڭ ادىلەتتى قارالۋىن قامتاماسىز ەتەدى. ا ح ق و سۋديالارى رەتىندە انگليا مەن ۋەلستەن كەلگەن 9 بەدەلدى سۋديا تاعايىندالدى. ولاردى انگليانىڭ بۇرىنعى جوعارعى سۋدياسى لورد ۆۋلف باسقارادى. اربيتراجدى ورتالىققا سونىمەن بىرگە تاعى 23 حالىقارالىق اربيتراج ەندى.