ەلباسىنىڭ قاتىسۋىمەن ا ح ق و بيرجاسىنىڭ العاشقى ساۋدا-ساتتىعىن ىسكە قوسۋ شاراسى وتۋدە

استانا. قازاقپارات - ەلباسى نۇرسۇلتان نازاربايەۆتىڭ قاتىسۋىمەن «استانا» حالىقارالىق قارجى ورتالىعى بيرجاسىنىڭ العاشقى ساۋدا-ساتتىعىن ىسكە قوسۋ شاراسى ءوتىپ جاتىر، دەپ حابارلايدى قازاقپارات ءتىلشىسى.

«بۇگىن ءبىز وتە ماڭىزدى وقيعاعا كۋا بولىپ وتىرمىز. وسىدان بىرەر جىل بۇرىن ەكسپونىڭ قۇرىلىسى باستالعان كەزدە قۇرمەتتى نۇرسۇلتان ءابىش ۇلى، كورمەدەن كەيىن بۇل جەردە حالىقارالىق قارجى ورتالىعى بولاتىندىعىن ايتقان ەدىڭىز. سول بۇگىن ىسكە اسىپ وتىر. بۇل ەلىمىزدىڭ ەكونوميكاسى ءۇشىن تاريحي ءسات، مەملەكەتىمىزدىڭ قارجى نارىعىنداعى جاڭا بەلەس. سوندىقتان وسى كۇنمەن ءسىزدى شىن جۇرەكتەن قۇتتىقتاۋعا رۇقسات ەتىڭىز»، - دەدى شارا بارىسىندا «سامۇرىق-قازىنا» ا ق باسقارماسىنىڭ ءتوراعاسى احمەتجان ەسىموۆ ەلباسى نۇرسۇلتان نازاربايەۆقا قاراتا.

ەستەرىڭىزگە سالا كەتسەك، 2018-جىلدىڭ 5- شىلدەسىندە ەلورداداعى كونگرەسس ورتالىقتا ەلباسى نۇرسۇلتان نازاربايەۆ «استانا» حالىقارالىق قارجى ورتالىعىنىڭ رەسمي قىزمەتىن ارنايى گونگ سوعۋ ارقىلى ىسكە قوسقان بولاتىن.

ايتا كەتسەك، 2015-جىلعى جەلتوقساندا قازاقستان پرەزيدەنتى نۇرسۇلتان نازاربايەۆ «استانا» حالىقارالىق قارجى ورتالىعىن قۇرۋ تۋرالى كونستيتۋتسيالىق زاڭعا قول قويدى. ا ح ق و- نىڭ ماقساتى - قارجىلىق قىزمەتتەردى كورسەتەتىن حالىقارالىق دەڭگەيدەگى جەتەكشى ورتالىق قالىپتاستىرۋ. پوستكەڭەستىك كەڭىستىكتە تۇڭعىش رەت اعىلشىن قۇقىعىنىڭ قاعيداتتارى ەنگىزىلەدى، قارجى ورتالىعىنىڭ رەسمي ءتىلى اعىلشىن ءتىلى بولادى.

تاۋەلسىز سوت، حالىقارالىق اربيتراجدى ورتالىق تاراپتاردىڭ قۇقىقتارىنىڭ ادىلەتتى قارالۋىن قامتاماسىز ەتەدى. ا ح ق و سۋديالارى رەتىندە انگليا مەن ۋەلستەن كەلگەن 9 بەدەلدى سۋديا تاعايىندالدى. ولاردى انگليانىڭ بۇرىنعى جوعارعى سۋدياسى لورد ۆۋلف باسقارادى. اربيتراجدى ورتالىققا سونىمەن بىرگە تاعى 23 حالىقارالىق اربيتراج ەندى.