ديماشتىڭ لوندونداعى كونسەرتىندە ءان شىرقايتىن اقتوبەلىك وقۋشى كىم
ول قازاقپارات تىلشىسىنە ارماندارى تۋرالى ايتىپ بەردى.
بيىل اقتوبە وبلىسىندا بالالار جىلى جاريالانىپ، «باقىتتى بالا» ۆوكالدىق بايقاۋى ۇيىمداستىرىلدى. بۇل بايقاۋدىڭ قوناعى ءارى تاۋەلسىز باقىلاۋشى بولعان ءانشى ديماش قۇدايبەرگەن اتالمىش بايقاۋدا كوڭىلىنەن شىققان ءانشى قىز نارعىز جانۇزاقوۆاعا ەرەكشە سىي جاسادى. ول لوندونداعى كونتسەرتىندە اقتوبەلىك وقۋشىنىڭ دا ءان شىرقايتىنىن ايتىپ، ونەرپازدى قۋانىشقا بولەدى.
سودان بەرى جۇلدىزدى كۇندى تاعاتسىزدانا كۇتىپ جۇرگەن نارعىزعا مينيسترلىكتەن تەلەفون شالىپ، لوندونعا باراتىنىن حابارلادى. ەرتەڭ جاس ءانشى استانا قالاسىنا بارىپ، ديماش قۇدايبەرگەننەن بىرنەشە ۆوكالدىق ساباق الادى. ءارى قاراي لوندون ساحناسى كۇتىپ تۇر.
«نارعىز 6 جاسقا تولماي مەكتەپ تابالدىرىعىن اتتادى. سول كۇننەن باستاپ «اپاي، ءان ايتايىن» دەپ ۇسىنىس جاساعان. كىشكەنتايىنان بايقاۋلارعا قاتىسىپ، 7 جاسىندا الماتى قالاسىنا باردى. قىزىم ۆوكالدان ساباق الىپ، نوتانى ۇيرەنبەي-اق، جۇرەك قالاۋىمەن ءان شىرقادى. تەك 2016 -جىلدان باستاپ جەكە مەكتەپتە ۆوكالدان ساباق الىپ ءجۇر.
ءبىرىنشى ۇستازى - گۇلگۇل نۇرلان قىزى. ول بيىل «باقىتتى بالا» بايقاۋىنا قاتىستى. ءدال وسى بايقاۋدا ديماش نوتالىق ساۋاتتىلىعىن ارتتىرىپ، مۋزىكالىق ءبىلىم الۋدى ۇسىندى. 2018 -جىلدىڭ قىركۇيەگىنەن باستاپ قازانعاپ اتىنداعى بالالار ونەر مەكتەبىنە باردى. قازىر ۆوكال مەن فورتەپيانو ۇيىرمەسىنە قاتىسىپ ءجۇر»، - دەيدى نارعىزدىڭ اناسى سىرعاگۇل جانۇزاقوۆا.
اقتوبە قالاسىنداعى «نۇر اقتوبە» اۋدانىندا ورنالاسقان ورتا مەكتەپتىڭ 8-سىنىپ وقۋشىسى الماتى، استانادا ءوتىپ جاتقان بايقاۋلاردان ءجيى باس جۇلدە الادى.
ماسەلەن، «عۇمىرداريا» بايقاۋىندا Ⅱ ورىن السا، «اينالايىن»، «بوزتورعاي»، «جاس تالانت»، «الەم تالانت Stars» بايقاۋلارىندا باس جۇلدەنى يەلەندى. كومپوزيتور ەرمەك ەلگەزەكوۆ «اقتوبەم» ءانىن جازىپ بەردى. قازىر نارعىز جانۇزاقوۆانىڭ رەپەرتۋارىندا بۇل ءان بار.
«مارقۇم كۇيەۋىم دومبىرا تارتىپ، ءان ايتاتىن. نارعىزدىڭ اكەسى «قىزىمنىڭ داۋىسى زور، ءبىر كۇنى جارق ەتەدى» دەپ ءجيى ايتىپ، ءوزى دايىندادى. 2014 -جىلى اكەسى كوز جۇمعان كەزدە نارعىز «كىمگە ارناپ ءان ايتام» دەپ مۇلدە مۋزىكاعا قارامادى. اپاسى «اكەڭ كورەدى، ءان ايت» دەپ كوندىرىپ، مەكتەپتە قايتادان ءان ايتتى. «باقىتتى بالا» بايقاۋىندا دا «بول» ءانىن اكەسىنە ارنادى. گران-پري مەن كونسەرتتە ءان شىرقاۋ قۇرمەتىنە يە بولعاندا قاتتى تاڭقالدىم، قۋاندىم. ناعىز تالانتتىڭ ءوز باعاسىن العانى كوڭىلگە سەنىم ۇيالاتادى. «نوتانى بىلمەسە دە ءدال ءتۇسىپ، ءاندى جۇرەگىنەن وتكىزىپ ايتادى» دەپ ءادىلقازىلار ايتتى»، - دەيدى سىرعاگۇل جانۇزاقوۆا.
نارعىز جانۇزاقوۆا حالىقارالىق بايقاۋلارعا ءوز ءانىن جىبەرىپ، ىرىكتەۋدەن وتكەنىمەن، ءارى قاراي جولاقىسى مەن جاتىن ورنىن تولەۋگە قينالىپ، تالاي شاقىرۋدى كەرى قايتاردى. جاس تالانت شەتەلگە ءبىرىنشى رەت جولعا شىقپاق. ول ۇلكەن ساحنانىڭ قىر- سىرىن ينتەرنەتتەن قاراپ، تانىسىپ، مەڭگەرۋدە.
« Indigo at the O2كونسەرت زالى تۋرالى ينتەرنەتتەن قاراپ، ءبىلدىم. مۇندا الەمگە تانىمال انشىلەر ءان شىرقاعان ەكەن. مەن ول ساحنادا «ەلىمنىڭ جۇرەگى - استانا» ءانىن ورىنداپ، قازاقستاندى كورەرمەنگە تانىستىرامىن»، - دەدى نارعىز جانۇزاقوۆا.
اعىلشىن ءتىلىن جاقسى مەڭگەرگەن وقۋشى ساپارعا شىقپاس بۇرىن ءوز ءبىلىمىن تاعى ءبىر پىسىقتاپ الدى. ءارى ديماش قۇدايبەرگەننىڭ كونتسەرتىندە ءان شىرقايتىنىن ەستىگەن جانكۇيەرلەر الەمنىڭ ءار تۇكپىرىنەن حابارلاسىپ، الەۋمەتتىك جەلى ارقىلى تانىسىپ جاتىر.
«كوپ ادام بايقاۋلارعا كۇش جۇمساماۋعا كەڭەس بەردى. اسىرەسە، داۋىس كۇتۋ ماڭىزدى. تاڭەرتەڭ داۋىسىمدى اشۋ ءۇشىن ايقايلاپ الامىن، ساباقتان شىققان سوڭ ءبىر ساعاتىمدى انگە ارنايمىن. ءوزىم قازاق، ورىس، اعىلشىن تىلدەرىندە ءان شىرقايمىن. اعىلشىن ءتىلىن مەڭگەرۋ ەش قيىندىق تۋعىزبادى»، - دەيدى ول.
اناسى سىرعاگۇل جانۇزاقوۆانىڭ ايتۋىنشا، تاجىريبەلى ماماندار الەۋمەتتىك جەلى ارقىلى تانىلۋ تۋرالى ءجيى ايتادى. ءبىراق نارعىز الەۋمەتتىك جەلى ارقىلى ەمەس، شىنايى ونەرىمەن تانىلۋدى ارماندايدى.
ايتا كەتەيىك، جاس تالانت پروديۋسەر باعىم مۇحيتدينوۆاعا بارىپ، تاعى ءبىر ساباق العان. ول نارعىزدى تىڭداعان سوڭ ۆوكالدى مەڭگەرىپ، داۋىس كۇتىمىن ەستەن شىعارماۋعا كەڭەس بەردى. ءتىپتى، 12 جاستاعى وقۋشىنىڭ 18 جاستاعى ءانشى سەكىلدى ءان ايتۋى باعىم مۇحيتدينوۆانى تاڭقالدىرعان. سۋرەت سالىپ، ءان ايتقاندى ۇناتاتىن نارعىز جانۇزاقوۆا ءانشى ءارى ديزاينەر بولۋدى ارماندايدى.