دۇنيەجۇزىلىك مەيىرىمدىلىك كۇنى قالاي پايدا بولدى؟
وسىعان وراي، 13 - قاراشا دۇنيەجۇزىلىك مەيىرىمدىلىك كۇنى بولىپ بەلگىلەندى. دۇنيەجۇزىلىك مەيىرىمدىلىك كۇنى (World kindness day) - سالىستىرمالى تۇردە، جاس مەرەكە. ول 1998 -جىلى باستاۋ الدى. بۇل جىلى جاپونيا استاناسىندا دۇنيەجۇزىلىك مەيىرىمدىلىك قوزعالىسىنىڭ العاشقى كونفەرەنسياسى ءوتتى. وعان كانادا، ۇلى بريتانيا، ا ق ش، سينگاپۋر، تايلاند جانە جاپونيا وكىلدەرى قاتىستى. وسى شاراعا قاتىسۋشىلار جاڭا پايدالى مەرەكەنى قابىلداۋ تۋرالى شەشىمگە كەلىپ، جىل سايىن تويلاناتىن ناقتى كۇندى بەلگىلەدى. بۇل كۇن رەسمي مارتەبەسىن 2000 -جىلى دۇنيەجۇزىلىك مەيىرىمدىلىك قوزعالىسىنىڭ ءۇشىنشى كونفەرەنتسياسىندا الدى. جالپى، بۇل ۇيىم 1998 -جىلى جاپونيادا پايدا بولدى. وعان ەرىكتى ادامدار الەمنىڭ ءار بۇرىشىنان جىلدام جينالا باستادى. بۇل ەرىكتىلەر ادال نيەتپەن مەيىرىمدى ىستەر جاسايدى جانە سول ارەكەتتەرىمەن باسقالارعا ۇلگى بولادى. دۇنيەجۇزىلىك مەيىرىمدىلىك قوزعالىسىنا كەز كەلگەن ادام قوسىلا الادى. ولاردىڭ سايتى بار، سول جەردە قاتىسۋشىلار ءبىر- بىرلەرىمەن سويلەسە الادى. سونىمەن قاتار، دۇنيەجۇزىلىك مەيىرىمدىلىك قوزعالىسىنىڭ رەسمي قۇجاتى بار. ول «مەيىرىمدىلىك دەكلاراتسياسى» دەپ اتالادى. مەيىرىمدىلىك كۇنىنىڭ بىرنەشە ماقساتى بار. بىرىنشىدەن، حالىقارالىق دارەجەدەگى بۇل كەرەمەت مەرەكە عالامشار تۇرعىندارىنىڭ قوعام يگىلىگى جانە ءوزىنىڭ تۇلعالىق دامۋى ءۇشىن مەيىرىمدى ىستەر جاساۋ قاجەتتىلىگىن تۇسىنۋگە كومەكتەسۋ كەرەك. ەكىنشىدەن، مەرەكە ءدىني، يدەولوگيالىق جانە تىلدىك كەدەرگىلەردەن قۇتىلىپ، ءتۇرلى ۇلتتاردىڭ تاتۋ بولۋىنا ىقپال ەتۋ قاجەت. ارينە، باستىسى، ءار ادام تازا نيەتپەن مەيىرىمدىلىك جاساۋدى قالاۋى ءتيىس. مەيىرىمدىلىك جاساۋ ارقىلى دەنساۋلىعىڭدى نىعايت! كوپتەگەن زەرتتەۋلەر بارىسىندا عالىمدار مەن دارىگەرلەر مىناداي شەشىمگە كەلگەن:
مەيىرىمدى ىستەر جاساۋ ادامنىڭ پسيحولوگيالىق تا، فيزيكالىق تا جاعدايىن جاقسارتادى. ادام بىرەۋگە جاقسىلىق جاساعان كەزدە ءوزىنىڭ ماڭىزدىلىعىن سەزىنەدى. ول ءار مەيىرىمدىلىك جاساعان سايىن نىعايا بەرەدى. سونىڭ ناتيجەسىندە، ءوزىن- ءوزى باعالاۋى مەن سەنىمدىلىگى ارتادى. سونىمەن قاتار، جاقسىلىق جاساعان ادامنىڭ ءارقاشان كوڭىل كۇيى جاقسى بولادى. مەيىرىمدى ءىس جاساۋدىڭ پايدالى فيزيولوگيالىق اسەرى بار: ءجيى مەيىرىمدىلىك جاساعان ادامداردىڭ يممۋنيتەتى جوعارى، جۇيكە جۇيەسى شىدامدى ءارى ساۋ بولاتىندىعى بايقالعان. ياعني، مەيىرىمدىلىك جاساۋ تەك جاعىمدى ەمەس، سونىمەن قاتار ءتيىمدى. عالىمدار مەيىرىمدى ادامدار ءوزىمشىل ادامدارعا قاراعاندا ۇزاق ءومىر سۇرەتىنىن جانە جاس كورىنەتىنىن انىقتاعان. ءوز مەيىرىمدىلىگىمەن اتاقتى بولعان ادامدار الەمدە مەيىرىمدى ادامدار بار. باقىتقا وراي، مەيىرىمدى جانداردىڭ سانى تاسجۇرەك تۇرعىندارعا قاراعاندا الدەقايدا كوپ.
قانداي دا ءبىر دەڭگەيدە اتاقتى بولعان كەي مەيىرىمدى ادامداردى ۇسىنامىز. نازير سوبحاني - 27 جاسار مەلبۋرن تۇرعىنى. ول شاشتاراز بولىپ جۇمىس ىستەپ، اپتاسىنىڭ 6 كۇنىن سۇلۋلىق سالونىندا وتكىزەدى. ال قالعان ءبىر كۇنىن، ياعني، جەتىنشى كۇنى قالانى ارالاپ، ءۇيى جوق كوشەدەگى ادامداردىڭ تەگىن شاشىن قيىپ، ساقالىن قىرىپ بەرەدى ەكەن. سونىمەن قاتار، ول ءوزىنىڭ ەرىكتى جۇمىسىن اتقارىپ جاتقاندا كەزدەسكەن ادامدارمەن كوڭىلدى سويلەسىپ، ولاردى دا جاڭا ءومىر باستاۋعا شاقىرادى.
بري درەدج - ءمۇعالىم. ول زياتكەرلىك تەليەۆيزيالىق شوۋىنا قاتىسىپ، اقشالاي 20 مىڭ دوللار ۇتىپ الادى. ول اقشانى وزىنە نەمەسە تۋىستارىنا ەمەس، ءوز وقۋشىلارىنا ارنايدى. بري ءاربىر وقۋشىسىنا جاڭا اياق كيىم الىپ بەرگەن.
حوللي كريستەنسەن - بالالار ونكولوگيالىق اۋرۋحاناسىنىڭ بۇرىنعى قىزمەتكەرى. حيمياتەراپيا سالدارىنان شاشىنان ايىرىلىعان دوسىنىڭ كىشكەنتاي قىزىنا كومەكتەسكىسى كەلگەن ول «راپۋنتسەل» ەرتەگىسىندەگى كەيىپكەردىڭ شاشىنا ۇقسايتىن پاريك الىپ، قىزدىڭ باسىنا تاعىپ بەرەدى. كىشكەنتاي قىزدىڭ قۋانىشىندا شەك بولمايدى. سودان سوڭ حوللي ەرىكتى ادامدارمەن قوسىلىپ، The Magic Yarn Project جوباسىن اشادى. بۇل جوبانىڭ مۇشەلەرى راكپەن اۋىراتىن قىزدارعا ديسنەي حانشايىمدارىنا ۇقسايتىن پاريك جاساپ، سىيعا تارتادى. مۇنداي مەيىرىمدى ءىس جاسايتىن ادامدار الەمدە از ەمەس. مەيىرىمدى ادامداردىڭ تازا نيەتتى ىستەرىنەن شابىت الىڭىزدار جانە ولاردىڭ قاتارىنا قوسىلىڭىزدار. مۇنداي يگىلىكتى ىسكە دوستارىڭىز بەن تۋىستارىڭىزدى شاقىرىڭىز. باستىسى، جاقسىلىقتى تەك 13 - قاراشا كۇنى ەمەس، ءار كۇنى جاساڭىز!
Massaget.kz