بەكزات ساتتارحانوۆ تۋرالى تەلەسەريال جارىققا شىعادى
بۇل تۋرالى «حابار» تەلەارناسىنىڭ باس پروديۋسەرى ايدوس تۇرىسبەك قازاقپارات تىلشىسىنە بەرگەن سۇحباتىندا ءمالىم ەتتى.
«بۇگىندە «حابار» اگەنتتىگى بوكسقا قاتىستى بىرنەشە اۆتورلىق جوبالاردى ءتۇسىرۋدى قولعا الۋدا. اتاپ ايتساق، وليمپيادا چەمپيونى، ءبىزدىڭ ماقتانىشىمىز بەكزات ساتتارحانوۆ تۋرالى عۇمىرنامالىق تولىقمەتراجدى فيلم تۇسىرۋگە دايىندىق جۇمىستارى ءجۇرىپ جاتىر. سونداي-اق، جۋىردا ەلىمىزدىڭ بوكس فەدەراتسياسىنىڭ 85 جىلدىعىنا ارنالعان دەرەكتى فيلمدى كورسەتەمىز. ودان بولەك، ا ق ش-تا ءجۇرىپ وتانىمىزدىڭ نامىسىن قورعاپ جۇرگەن بوكسشىلار تۋرالى دەرەكتى تۋىندى جاساۋ دا جوسپاردا بار»، - دەدى «حابار» تەلەارناسىنىڭ باس پروديۋسەرى ايدوس تۇرىسبەك.
باس پروديۋسەر اتالعان جوبالاردى ءتۇسىرۋ تەلەارنا كورەرمەندەرى الدىنداعى ۇلكەن جاۋاپكەرشىلىك ەكەندىگىن ايتتتى.
«ساتتارحانوۆقا قاتىستى جوبا 2 تىلدە تۇسىرىلەدى. وندا بوكسشىنىڭ ءومىربايانى مەن ۇلكەن سپورتتاعى جەتكەن جەتىستىكتەرى تۋرالى باياندالادى. الدىمەن 5 بولىمنەن تۇراتىن سەريال رەتىندە ءتۇسىرۋ جوسپارلانۋدا، ودان بولەك عۇمىرنامالىق تولىق مەتراجدى فيلم تۇسىرىلەدى. بۇگىندە تەلەتۋىندىنى تۇسىرۋگە دايىندىق ياعني، بوكسشىنىڭ اتا-اناسىمەن جانە باپكەرلەرىمەن كەلىسسوز جۇمىستارى ءجۇرىپ جاتىر. فيلمدى تانىمال رەجيسسەر مۇرات بيدوسوۆ تۇسىرەدى جانە ول ءوز كورەرمەندەرىنە 2019 -جىلى جول تارتادى»، - دەدى ول.
سونىمەن قاتار، تەلەارنا پروديۋسەرى فيلمدى تۇسىرۋگە ەلىمىزدىڭ تانىمال بوكسشىلارى كەڭەسشى رەتىندە تارتىلاتىنىن جانە ونىڭ نەگىزگى ءبولىمى سپورتشىنىڭ تۋعان جەرى تۇركىستاندا تۇسىرىلەتىنىن ايتتى.