ق ر پرەزيدەنتى ا ق ش پەن قىتاي اراسىنداعى ەكونوميكالىق تەكەتىرەس كەدەيشىلىكتى ورشىتەتىنىن ايتتى
بۇل تۋرالى بۇگىن ەلوردادا ءوتىپ جاتقان استانا كلۋبىنىڭ جالپى وتىرىسىندا ق ر پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات ءتىلشىسى.
«ەكونوميكالىق تەكەتىرەس كوپشىلىگى اشىق تۇردە ساۋدا سوعىسى دەپ اتايتىن فازاعا دەيىن ۋشىعا ءتۇستى. ولاردىڭ بىرەۋى الەمدىك ەكونوميكانىڭ ۇشتەن ءبىرى، جاھاندىق ەكسپورتتىڭ 20 پايىزى، تىكەلەي ينۆەستيتسيا اعىنىنىڭ ۇشتەن بىردەن استامى تيەسىلى ا ق ش پەن قىتايدىڭ اراسىندا ورىن الۋدا» ، - دەدى نۇرسۇلتان نازاربايەۆ.
قازاقستان پرەزيدەنتىنىڭ پايىمىنشا، ا ق ش پەن قىتاي اراسىنداعى مۇنداي ەكونوميكالىق تەكەتىرەس الەمدىك ەكونوميكا ءوسىمىنىڭ تومەندەۋىنە الىپ كەلەدى. ال ونىڭ سالدارىنان اسىرەسە دامۋشى ەلدەردە جاعداي ناشارلاي تۇسەدى.
«كەدەيشىلىك تەرەڭدەي ءتۇسىپ، جۇمىسسىزدىق ارتا تۇسەدى. مۇنىڭ بارلىعى دا تەرروريزم، ميگراتسيا جانە سەپاراتيزم ءۇشىن جاقسى نەگىز بولادى. اۋعانستاندا ءدال وسىلاي باستالدى. سوڭعى جىلدارى ورىن الىپ وتىرعان ەسىرتكى قىلمىسى، تەرروريزم مەن ەكسترەميزم، 1979 -جىلى باستالعان سوعىستىڭ سالدارى» ، - دەدى ەلباسى.
ايتا كەتەيىك، ەلباسى جيىن بارىسىندا ۇلكەن ەۋرازيانىڭ سۇلباسى قالىپتاسىپ كەلە جاتقانىن ايتىپ، رەسەي، ا ق ش جانە قىتاي اراسىنداعى گەوساياسي باسەكەلەستىككە الاڭداۋشىلىق تانىتتى.
سونىمەن قاتار نۇرسۇلتان نازاربايەۆ الەمدىك دەرجاۆالار قارۋلانۋ جارىسىنا قايتا ورالۋى مۇمكىن ەكەندىگىن ەسكەرتتى.