تاياۋ شىعىستى ۇلكەن سوعىس ەلەسى كەزىپ ءجۇر - نۇرسۇلتان نازاربايەۆ
«ۇلكەن ەۋرازيانىڭ كەيبىر وڭىرلەرىندە كەڭ اۋقىمدى اسكەري تەكەتىرەستىڭ ورىن الۋى قاۋپى جوعارى. جارىلىس قاۋپى بارىنشا جوعارى وڭىرلەردىڭ ءبىرى تاياۋ شىعىس بولىپ وتىر. قازىرگى ۋاقىتتا ءبىز سيرياداعى داعدارىستان تۋىنداعان تۇراقسىزدىقتى، يراكتاعى ساياسي شيەلەنىستىڭ ساقتالۋىن، ليۆياداعى ازاماتتىق سوعىستى، اراب ەلدەرىندەگى ىشكى سىن- تەگەۋىرىندەردىڭ دامۋىن بايقاپ وتىرمىز» ، - دەپ اتاپ ءوتتى ەلباسى.
ق ر پرەزيدەنتى مۇنىڭ بارلىعى وتە كۇردەلى جاعدايدا جانە الەمدىك قوعامداستىق ۇزاق ۋاقىت بويى جۇمىس ىستەۋىنىڭ ناتيجەسىندە قول جەتكىزىلگەن يرانمەن اراداعى يادرولىق كەلىسىمنىڭ ىدىراۋىمەن بايلانىستى تەرەڭدەي تۇسكەندىگىن باسا ايتتى. قازاقستاننىڭ الەم ەلدەرىنە ۇلگى كورسەتىپ، يادرولىق قارۋدان ءوز ەركىمەن باس تارتقانىن ەسكە سالدى.
«كەلەر جىلى شەشىلمەگەن پروبلەمالاردىڭ شۋماعى تاياۋ شىعىسقا ۇلكەن سوعىس ەلەسىن قايتا ورالتىپ، مۇنان ارى شىرمالانا ءتۇسۋى مۇمكىن» ، - دەدى نۇرسۇلتان نازاربايەۆ.
ايتا كەتەيىك، ەلباسى جيىن بارىسىندا ۇلكەن ەۋرازيانىڭ سۇلباسى قالىپتاسىپ كەلە جاتقانىن ايتىپ، رەسەي، ا ق ش جانە قىتاي اراسىنداعى گەوساياسي باسەكەلەستىككە الاڭداۋشىلىق تانىتتى.
سونىمەن قاتار نۇرسۇلتان نازاربايەۆ الەمدىك دەرجاۆالار قارۋلانۋ جارىسىنا قايتا ورالۋى مۇمكىن ەكەندىگىن ەسكەرتتى.