تۇماۋدى قالاي جىلدام ەمدەۋگە بولادى
تۇماۋراتۋدىڭ ونداعان سەبەپ بولۋى مۇمكىن. ول جەدەل رەسپيراتورلىق- ۆيرۋستىق ينفەكتسيالاردان باستاپ وتكىر ماۋسىمدىق اللەرگيالارعا، گورموندىق وزگەرىستەرگە نەمەسە تەمپەراتۋرانىڭ كۇرت اۋىسىنا بايلانىستى بولۋى ىقتيمال.
ءبىراق بۇل ماڭىزدى ەمەس. مۇرىننىڭ بىتەلۋىنە نەمەسە ودان سۋ اققانىنا قاراماستان، قيىندىقتان قۇتىلۋدىڭ قاراپايىم تاسىلدەرى بار. ولاردىڭ كەيبىرەۋلەرى تەك ۋاقىتشا جەڭىلدىك اكەلەدى، الايدا باسقالارى تۇماۋدان جىلدام جانە تۇپكىلىكتى ارىلۋعا كومەكتەسەدى. ءبىز ۇسىناتىن ادىستەردىڭ ىشىنەن وزىڭىزگە قولايلى بولىپ كورىنەتىنىن تاڭداڭىز.
1. ىستىق شاي ءىشىڭىز
تۇماۋ تيسە ىستىق شاي نەمەسە كەز- كەلگەن باسقا دا سۋسىن ءىشىڭىز. ەڭ باستىسى، ول ىستىق بولۋى كەرەك، ءبىراق كۇيدىرەتىندەي ەمەس. تۇماۋ تيگەندە ىستىق سۋسىن مەن ونىڭ بۋى جۇتقىنشاقتىڭ قان اينالىمىن ارتتىرادى. ناتيجەسىندە بىتەلگەن مۇرىن اشىلىپ، دەم الۋ وڭايىراق بولادى.
2. مۇمكىندىگىنشە كوپ سۇيىقتىق ىشكەن دۇرىس
جوعارىداعى تارماقتى ەسكەرە وتىرىپ، اسەرى كۇشتى بولۋ ءۇشىن جىلى سۋسىن ءىشۋ كەرەك. ءبىراق ەگەر قولىڭىزدا سالقىن سۋسىن عانا بولسا، ول دا جارامدى. باستىسى سۇيىقتىق ءىشۋ قاجەت. سەبەبى، دەنەدە سۋ جەتكىلىكسىز بولعان كەزدە مۇرىن بىتەلىپ، دۇرىس جۇمىس ىستەمەيدى. تاناۋدىڭ ىشىندەگى شىرىش قۇرعاپ، قالىڭداپ، مۇرىننىڭ بىتەلۋىنە اكەلەدى. سونىمەن قاتار، مۇرىندا وسىنداي قالىڭ ماڭقا قالىپتاسقاندا ۆيرۋستار مەن باكتەريالار ءوزىن جەڭىل سەزىنەدى. ياعني اۋرۋ ۇزاققا سوزىلۋى نەمەسە جالپى سۋىقتان الدەقايدا جاعىمسىز نارسەگە مىسالى، كەڭسىرىك اۋرۋىنا (گايموريت) اينالۋى مۇمكىن.
سۇيىقتىق ءىشۋ ارقىلى ءسىز شىرىشتى سۇيىق جاسايسىز جانە سونىڭ ناتيجەسىندە ونىڭ قاباتى جۇقالانادى. ەگەر مۇرىنىڭىز بىتەلگەن بولسا، ول دا كەتەدى. ال قالىپتى اعىمداعى ماڭقا اعزاعا تاناۋداعى ۆيرۋستاردى جىلدام شىعارىپ، جالپى تۇماۋ مەن سۋىقتان ارىلۋعا مۇمكىندىك بەرەدى.
3. تاماعىڭىزدى بۋلاڭىز (ينگالياتسيا)
ىستىق بۋمەن دەم الۋ سۋىقتىڭ، سونىڭ ىشىندە تۇماۋدىڭ اسەرىن كۇرت تومەندەتەدى جانە اۋرۋ ۋاقىتىن قىسقارتادى. بەدەلدى Healthline مەديتسينا رەسۋرسى تاماقتى كەلەسىدەي ادىسپەن بۋلاۋدى ۇسىنادى:
كاسترولگە تازا سۋ قۇيىپ جىلىتىڭىز. ءبىراق، ونى قايناتۋدىڭ قاجەتى جوق، باستىسى سۋدان جىلى بۋ شىعۋى كەرەك.
جىلى سۋ قۇيىلعان كاسترولدى ۇستەلگە نەمەسە باسقا دا ىڭعايلى جەرگە قويىڭىز دا، بەتىڭىزدى 20-30 مينۋت بۋدا ۇستاڭىز. ەگەر بۋ وتە ىستىق بولسا شامالى كۇتە تۇرىڭىز.
مۇرىن ارقىلى تەرەڭ تىنىس الىڭىز. اۋانى دا مۇرىننان شىعارىڭىز. شىرىشتان قۇتىلۋ ءۇشىن شامالى كۇش سالىپ دەم الىپ كورىڭىز.
سونداي- اق، ينگالياتسياعا ارنالعان سۋعا ەۆكاليپت، اشى جالبىز، شالفەي، روزمارين، قاراعاي، شاي اعاشى، جەبىرشوپتىڭ اسەرى بار ەفير مايىنان بىرنەشە تامشى قوسۋعا بولادى.
4. ىستىق دۋش قابىلداڭىز
جىلدام جەڭىلدەگىڭىز كەلسە، ىستىق دۋش قابىلداعان دۇرىس. ينگالياتسيا نەمەسە ىستىق شاي سياقتى، دۋشتا مۇرىننان اققان سۋدى جاقسى توقتاتادى جانە مۇرىننىڭ بىتەلۋ سەزىمىن جويادى.
5. مۇرىنعا جىلى كومپرەسس جاساڭىز
كۇنىنە 3-4 رەت، 2-3 مينۋتتان ىستىق سۋعا مالىنعان دىمقىلدانعان مايلىقتى مۇرنىڭىزعا قويىپ قويىڭىز. ءبىراق، مايلىق قاتتى كۇيدىرىپ جىبەرەتىندەي ىستىق بولماۋى كەرەك.
6. مۇرىندى تۇز ەرىتىندىسىمەن شايىپ شىعىڭىز
ءدارىحانادان دايىن تۇز اۋا كىرنەسىن ساتىپ الىڭىز نەمەسە ونى ءوزىڭىز ۇيدەن دايىنداڭىز. تۇز ەرىتىندىسىن دايىنداۋ ءادىسى دە قاراپايىم. 240 ميلليليتر ستاقانعا جىلى سۋ قۇيىپ، وعان ½ شاي قاسىق تۇز بەن ءبىر شىمشىم اس سوداسىن قوسىڭىز. مۇرنىڭىزدى وسى ەرىتىندىمەن كۇنىنە 3-4 رەت جاعىمسىز سيمپتومدار جويىلعانشا شايىڭىز.
7. تامىر تارىلتقىش مۇرىن سپرەيلەرىن نەمەسە تامشىلارىن قولدانىڭىز
ولار ءىسىنۋدى جويىپ جانە جاڭا ماڭقانىڭ قالىپتاسۋىن باياۋلاتادى. ناتيجەسى دە جىلدام. مۇرىن قايتادان دەم الادى جانە ودان تامشى اقپايدى. بۇل اسەر ادەتتە، بىرنەشە ساعات بويى ساقتالادى، سودان كەيىن ءراسىمدى تاعى قايتالاۋ قاجەت.
ءبىراق، ەسىڭىزدە بولسىن، مۇنداي قۇرالداردى 3 كۇننەن ارتىق پايدالانۋعا بولمايدى. ايتپەسە، جاعىمسىز جاناما اسەرلەرى بولۋى مۇمكىن. مۇنداي سپرەيلەردى ۇزاق قولدانسا ادام وعان ادەتتەنىپ قالادى، سونىڭ سالدارىنان مۇرىننىڭ شىرىشتى قاباتى جۇقارىپ، رينيت پەن باسقا دا مۇرىن اۋرۋلارى پايدا بولۋى مۇمكىن.
8. دارىگەرگە قارالىڭىز
تۇماۋ - بۇل تاۋەلسىز اۋرۋ ەمەس، تەك سيمپتوم. ودان تولىعىمەن ايىعۋ ءۇشىن «جاناما اسەرى» بار اۋرۋدى جەڭۋ كەرەك. بۇنى كاسىبي مامانداردىڭ نەمەسە تەراپيەۆتەردىڭ جەتەكشىلىگىمەن جۇرگىزگەن ءتيىمدى.
ماڭىزدى ەسكەرتۋ: جەدەل مەديتسينالىق كومەكتى قاجەت ەتەتىن تۇماۋ تۇرلەرى بولاتىنىن بىلە ءجۇرىڭىز.
تۇماۋ كەزىندە مۇرىن مەن ماڭداي نەمەسە بەت جاعىڭىز بەن كوزىڭىز ءىسىپ تۇرسا مىندەتتى تۇردە دارىگەرگە بارىڭىز نەمەسە جەدەل جاردەم قىزمەتىن شاقىرتىڭىز.
سۋىق تيۋدەن باسقا، تاماعىڭىز قاتتى اۋىرسا، كومەكەي بەزىندە نەمەسە جۇتقىنشاقتىڭ باسقا جەرلەرىندە اق نە سارى داقتاردى بايقاساڭىز؛
مۇرىننان شىققان سۇيىقتىقتىقتا جاعىمسىز ءيىس بولسا؛
تۇماۋ 10 كۇنگە سوزىلعان جوتەلدىڭ سالدارىنان پايدا بولسا جانە مۇرىننان اققان سۇيىقتىق سارى- جاسىل نەمەسە سۇر ءتۇستى بولسا؛
باس اۋرۋى باستالعاننان كەيىن بىردەن مۇرىن بىتەلىپ، تۇماۋراتساڭىز جانە تۇماۋمەن بىرگە قالتىراپ قىزۋىڭىز كوتەرىلسە دارىگەرگە بارىڭىز نەمەسە جوق دەگەندە كەڭەس الۋ ءۇشىن ماماندارعا حابارلاسىڭىز.
Stan.kz