پرەمەر-مينيستر: تاريفكە قاتىستى ءاربىر ازاماتتىڭ ۇسىنىسى ەسكەرىلۋى كەرەك
بۇگىن ۇكىمەت وتىرىسىندا پرەمەر-مينيستر باقىتجان ساعىنتايەۆ وسىلاي ءمالىم ەتتى، دەپ حابارلايدى قازاقپارات.
«ەنەرگەتيكا جانە ۇلتتىق ەكونوميكا مينيسترلىكتەرى قابىلداپ جاتقان شارالاردى قولدايمىن. دەگەنمەن 2019-جىلعى قاڭتاردان باستاپ ەلەكتەر ەنەرگياسى مەن جىلۋعا تاريفتەردى تومەندەتۋمەن شەكتەلىپ قالماۋىمىز كەرەك. كەشە ۇلتتىق ەكونوميكا ءمينيسترىنىڭ ۇسىنىستارىن تالقىلاعان بولاتىنبىز. مىسالى، ەلەكتروندى فورماتپەن تاريفتەردىڭ جوباسىن ۇسىنعان كەزدە، قوعام ءوزىنىڭ پىكىرلەرىن ەلەكتروندى فورماتپەن سىزدەرگە جولداي الادى. كەز كەلگەن ازاماتتىڭ ۇسىنىستارى ەسكەرىلۋى قاجەت. مونوپوليستەر تاريفتەردى تۇسىردىك دەپ وزدەرىنىڭ كورسەتىپ وتىرعان قىزمەتتەرىنىڭ ساپاسىن ناشارلاتىپ الماۋى كەرەك»، - دەپ توقتالدى ۇكىمەت باسشىسى.
ب. ساعىنتايەۆ جۇمىس توبى ءدال وسى باعىتتار بويىنشا شارالاردى ىسكە اسىرۋى ءتيىس ەكەندىگىن تاپسىردى.
بۇدان بۇرىن حابارلانعانداي، جاقىندا اقوردادا قاۋىپسىزدىك كەڭەسىنىڭ وتىرىسىندا مەملەكەت باسشىسى نۇرسۇلتان نازاربايەۆ كوممۋنالدىق قىزمەتتەرگە تاريفتەردى زاڭسىز وسىرگەن تابيعي مونوپوليالار سۋبەكتىلەرىن جازالاۋدى تالاپ ەتتى.
سونىمەن قاتار پرەزيدەنت قازاقستاندا ەلەكتر ەنەرگياسى قۇنىن تومەندەتۋدى تاپسىردى.
ايتا كەتەيىك، مونوپولياعا قارسى قىزمەتتى كۇشەيتۋ زاڭناماسىنا تۇزەتۋلەر ازىرلەنۋدە.