ا ق ش ساراپشىلارى: سولتۇستىك كورەيا زىمىران بازالارىن جاسىرىپ وتىر

None
None
 استانا. قازاقپارات - امەريكالىق ساراپشىلار سولتۇستىك كورەيادا 20 شاقتى زىمىران بازاسى بارىن، پحەنياننىڭ ولاردى جاسىرىپ وتىرعانىن مالىمدەدى.

ساراپشىلار ول بازالاردىڭ 13 ءىنىڭ ورنالاسقان جەرىن انىقتاعان. بۇل تۋرالى Reuters اگەنتتىگى ۆاشينگتونداعى ستراتەگيالىق جانە حالىقارالىق زەرتتەۋلەر ورتالىعىنا سىلتەمە جاساپ حابارلادى.

ماماندار پحەنيان بۇل بازالاردى حالىقارالىق باقىلاۋشىلاردان جاسىرماق بولعان دەپ سانايدى. باقىلاۋشىلار بيىل ماۋسىمدا ا ق ش پەن سولتۇستىك كورەيا باسشىلارىنىڭ سامميتىندە جاسالعان سولتۇستىك كورەيانىڭ يادرولىق باعدارلامادان باس تارتۋ كەلىسىمىنىڭ ورىندالۋىن قاداعالاۋى ءتيىس بولعان.

ساراپشىلاردىڭ مالىمەتى بويىنشا، توتەنشە جاعدايلار بولا قالعان كەزدە بۇل بازالاردان زىمىران اتىلۋى مۇمكىن. زەرتتەۋشىلەر زىمىراندار يادرولىق وق تۇمسىقپەن جاراقتالماعاننىڭ وزىندە ايتارلىقتاي قاۋىپ توندىرە الادى دەپ سانايدى.

ساراپشى دجوزەف بەرمۋدەستىڭ پىكىرىنشە، پحەنيان بۇعان دەيىن «سوحە» زىمىران پوليگونىن باسقا زىمىران بازالارىن جاسىرىپ قالۋ ءۇشىن كوپشىلىككە جاريا قىلىپ بۇزعان.

سولتۇستىك كورەيا «سوحە» پوليگونىنان وزگە بيىل مامىردا «پۋنگەري» پوليگونىن» بۇزعان. نىساندى قيراتۋعا شەتەلدىك ماماندار قاتىستىرىلعان جوق.

بۇعان دەيىن امەريكالىق بارلاۋ ا ق ش پرەزيدەنتى دونالد ترامپ پەن سولتۇستىك كورەيا باسشىسى كيم چەن ىن اراسىندا ۋاعدالاستىق بولعانىنا قاراماستان پحەنيان يادرولىق باعدارلامادان باس تارتۋدىڭ ناقتى قادامدارىن جاساماي وتىرعانىن بىرنەشە رەت مالىمدەگەن.

ال سولتۇستىك كورەيا ب ا ق- ى ا ق ش پەن وڭتۇستىك كورەيانى كورەي تۇبەگىندەگى شيەلەنىستى باسەڭسىتەتىن كەلىسىمدى بۇزىپ، قايتادان اسكەري جاتتىعۋ وتكىزىپ جاتىر دەپ ايىپتاعان.

«ازاتتىق»

سوڭعى جاڭالىقتار