ولجاس سۇلەيمەنوۆتىڭ نەمەرەسىنىڭ ولىمىنە قاتىستى ءىس بويىنشا سوت ۇكىمى شىقتى
«سوت ماليكا مۇحيتوۆانى ق ر قىلمىستىق كودەكسىنىڭ 345-بابى 3-بولىگى بويىنشا كىنالى دەپ تاۋىپ، قاۋىپسىزدىگى تومەن تۇزەتۋ مەكەمەسىندە ەكى جىلعا باس بوستاندىعىنان ايىرۋ تۋرالى، 5 جىلعا كولىك جۇرگىزۋ قۇقىعىنان ايىرۋ تۋرالى ۇكىم شىعارادى»، - دەدى ىسكە قاتىستى ۇكىم شىعارعان سۋديا قانات توباعالي ۇلى.
ماليكا مۇحيتوۆا سونىمەن بىرگە سوت پروتسەسى كەزىندە كەتكەن 324 مىڭ تەڭگەلىك پروتسەسسۋالدىق شىعىندى وتەيتىن بولدى.
ەسكە سالا كەتسەك، وسى ماۋسىم ايىندا استاناداعى جول اپاتىندا ولجاس سۇلەيمەنوۆتىڭ 26 جاستاعى نەمەرەسى ەسكەندىر سۇلەيمەنوۆ مەرت بولعان ەدى. ەسكەندىر تىزگىندەگەن موتوتسيكل قيىلىسقا شىققان كولىككە سوعىلدى.
ارادا كوپ وتپەي استانا قالالىق ىشكى ىستەر دەپارتامەنتى اپاتقا سەبەپكەر بولۋى مۇمكىن Hyundai اۆتوكولىگىنىڭ يەسى، 29 جاستاعى استانالىق كەلىنشەككە قاتىستى تەرگەۋ امالدارى ءجۇرىپ جاتقانىن حابارلاعان ەدى.
ايتا كەتسەك، 12- قازاندا ولجاس سۇلەيمەنوۆتىڭ نەمەرەسىنىڭ ولىمىنە قاتىستى سوت پروتسەسى باستالىپ، ەسكەندىر سۇلەيمەنوۆ قازا تاپقان جول اپاتى بويىنشا سوتتالۋشى ماليكا مۇحيتوۆا مارقۇمنىڭ اتا-اناسىنان كەشىرىم سۇراعان ەدى.
ءىس بويىنشا پروكۋرور ءا. بارايەۆ سوتتان ايىپتالۋشىنى 2 جىلعا باس بوستاندىعىنان ايىرۋدى سۇراعان ەدى.