ترامپ پۋتين، ماكرون جانە مەركەلمەن زىمىران كەلىسىمىن تالقىلادى

استانا. قازاقپارات - ا ق ش پرەزيدەنتى دونالد ترامپ پاريجدە رەسەي پرەزيدەنتى ۆلاديمير پۋتين، فرانسيا پرەزيدەنتى ەممانۋەل ماكرون، گەرمانيا كانسلەرى انگەلا مەركەلمەن جانە باسقا دا الەم ەلدەرىنىڭ باسشىلارىمەن كەزدەسىپ، ورتا جانە قىسقا قاشىقتىققا ۇشاتىن زىمىرانداردى جويۋ جونىندەگى كەلىسىم جايىن تالقىلادى.

 بۇل جايىندا اق ءۇيدىڭ باسپا ءسوز حاتشىسى سارا ساندەرس حابارلادى.

 كەزدەسۋدە سونىمەن قاتار سانكسيالار، سيرياداعى جاعداي، سولتۇستىك كورەيا ماسەلەلەرى جانە باسقا دا ايماقتىق پروبلەمالار تالقىلاندى. كەزدەسۋ 11 - قاراشا كۇنى پاريجدە ءبىرىنشى دۇنيەجۇزىلىك سوعىستىڭ اياقتالعانىنا ءجۇز جىل تولۋىنا ارنالعان سالتاناتتى شارا اياسىندا ەكى ساعاتقا سوزىلعان تۇسكى اس كەزىندە بولعان.

بۇعان دەيىن ۆلاديمير پۋتين دونالد ترامپپەن سويلەسكەنىن راستاعان. الايدا، ول قانداي تاقىرىپتا سويلەسكەنىن ايتپاعان. رەسەي پرەزيدەنتىنىڭ باسپا ءسوز حاتشىسى دميتريي پەسكوۆتىڭ سوزىنشە، كەلەلى كەلىسسوز بولماعان، پرەزيدەنتتەر تەك تۇسكى اس كەزىندە ءبىر- بىرىمەن امانداسىپ، از- كەم سويلەسكەن.

اۋەلدە ا ق ش پەن رەسەي پرەزيدەنتتەرى پاريجدە ەكى جاقتى كەلىسسوز وتكىزەدى دەپ جوسپارلانعان ەدى. ءبىراق فرانسيا پرەزيدەنتى «قازىرگى ساياسي ماسەلەلەر تاريح تراگەدياسىن ەسكە الۋعا كەدەرگى كەلتىرەدى دەپ ساناعاندىقتان» كەزدەسۋ وتپەي قالعان.

ا ق ش پەن رەسەي پرەزيدەنتتەرى وسى ايدىڭ سوڭىندا بۋەنوس- ايرەستە كەزدەسۋى مۇمكىن. مۇندا 30 - قاراشا مەن 1 - جەلتوقسان ارالىعىندا «ۇلكەن جيىرمالىق» (G20) ەلدەرى باسشىلارىنىڭ سامميتى وتەدى. الايدا، پەسكوۆ پۋتين مەن ترامپتىڭ ارگەنتينادا كەزدەسەتىنى جونىندە ازىرگە ناقتى كەلىسىم جاسالماعانىن، جاعداي ءجيى وزگەرىپ جاتقانىن ايتادى.

وسى كەزگە دەيىن پۋتين مەن ترامپ ەكى رەت قانا - 2017 -جىلى جازدا گامبۋرگتە G20 سامميتىندە جانە 2018 -جىلى شىلدەدە حەلسينكيدە جەكە كەزدەسكەن.

www.azattyq.org