پاۆلوداردا بوگەنباي باتىر تۋرالى رومان تانىستىرىلدى

استانا. قازاقپارات - س. تورايعىروۆ اتىنداعى وبلىستىق كىتاپحانادا پ م ۋ قازاق ءتىلى جانە جۋرناليستيكا كافەدراسىنىڭ پروفەسسورى سەرىك ەلىكبايدىڭ «قانجىعالى بوگەنباي» تاريحي رومانىنىڭ تۇساۋكەسەرى ءوتتى، دەپ حابارلايدى pavlodarnews.kz.

سەرىك ەلىكبايەۆتىڭ ايتۋىنشا، اتالمىش تۋىندى - ەرتىس وڭىرىندەگى تاريحي تاقىرىپقا ارنالعان رومانداردىڭ ءبىرى.

«بۇل قازاق باتىرى، قولباسشى قانجىعالى بوگەنبايدىڭ ءومىرى مەن ەرلىگىنە ارنالعان. باتىردىڭ باسقا كەيىپكەردەن ەرەكشەلىگى سول، بوگەنباي باتىر «اق سۇيەكتەردىڭ» وكىلى ەمەس، حالىقتان شىققان قاراپايىم ازامات»، - دەيدى رومان اۆتورى.

پروفەسسور كىتاپتى جازۋ بارىسىندا ءتۇرلى تاريحي دەرەككوزدەرگە جۇگىنگەن. قۇندى دەرەكتەر سانكت- پەتەربۋرگتەگى تانىمال كۋنستكامەرا، ۋكراينالىق جانە قىتايلىق مۇراعاتتاردان تابىلعان.

كىتاپ 1000 دانامەن باسىلىپ شىقتى.

سەرىك ەلىكبايەۆ الداعى ۋاقىتتا تاعى ءۇش رومان جازىپ، قالىڭ بۇقارا ءۇشىن باسىپ شىعارماق.