قاراعاندىلىق كاسىپكەر شەمىشكە قابىعىندا ساڭىراۋقۇلاقتار وسىرۋدە

قاراعاندى. قازاقپارات - قاراعاندى وبلىسى اباي اۋدانىنىڭ توپار كەنتىندە كاسىپكەر ءاليا جۇماتايەۆا اسپا ساڭىراۋقۇلاقتارىن ءوسىرۋدى دامىتۋدا.

ەكولوگيالىق تازا وتاندىق ءونىم تۇتىنۋشىلار اراسىندا سۇرانىسقا يە. تاۋار قاراعاندىعا جانە وبلىستىق باسقا دا قالالارىندا تاراتىلادى. بۇل تۋرالى اكىمدىكتىڭ سايتى حابارلايدى.

كاسىپكەر ايەل «بيزنەستىڭ جول كارتاسى-2020» باعدارلاماسى بويىنشا مەملەكەتتىك قولداۋ قۇرالدارىنىڭ ءبىرىن پايدالانعان.

وسىدان ەكى جىل بۇرىن ءاليا جۇماتايەۆا بيزنەس- جوسپارىن قورعاپ، ءوز ءىسىن دوڭگەلەتىپ الىپ كەتۋگە 1,8 ميلليون تەڭگە كولەمىندە گرانت ۇتىپ العان. ول «توپار جىلىجايلارىندا» 2000 شارشى مەتر اۋماقتا جەردى جالعا الىپ، وندا ساڭىراۋقۇلاق فەرماسىن اشقان.

«ماماندىعىم بويىنشا مەن ەسەپشىمىن. ون جىل بۇرىن قاراعاندى وبلىسىنا پەتروپاۆلدان كوشىپ كەلدىم. ءاردايىم جان-تانىممەن ساڭىراۋقۇلاقتاردى جاقسى كوردىم. سورەلەردە تەك يمپورتتىق قوزىقۇيرىق ساڭىراۋقۇلاقتار عانا بولاتىن. ءوز ءىسىمدى اشۋعا بەل بۋعاندا، وسى سالانى تاڭدادىم. بىرىنشىدەن، ول يمپورتتى الماستىرۋ جانە تۇتىنۋشىلاردى ساپالى، ەكولوگيالىق تازا ونىممەن قامتاماسىز ەتۋ. ءبىز ەشقانداي حيميكاتتاردى قولدانبايمىز. جوبا ءساتتى ءجۇرىپ كەتتى. ەندى ءوز قاراجاتىمىز ەسەبىنەن كونسەرۆىلەۋ بەكەتىن اشۋدى جوسپارلاپ وتىرمىز: ساڭىراۋقۇلاقتى تۇزداپ، ولاردان يكرا جاساعىمىز كەلەدى، - دەيدى كاسىپكەر ايەل.

ونىڭ ايتۋىنشا، الدىمەن اسپا ساڭىراۋقۇلاقتاردى ساباندا وسىرۋدەن باستاعان، الايدا ونىڭ جۇمىسى دا، شىعىنى دا كوپ بولعان. سونان سوڭ باسقا ماتەريالدى كورگەن - كۇنباعىس شەمىشكەسىنىڭ قابىعىن. ول جاقسى ونىمدىلىك بەرە باستاعان.

شەمىشكە قابىقتارىن الماتىدان، وڭدەۋ زاۋىتتارىنىڭ بىرىنەن الىپ كەلەدى.

ساڭىراۋقۇلاق فەرماسىنىڭ قۋاتتىلىعى ايىنا 8000-9000 توننا ءونىم وسىرۋگە مۇمكىندىك بەرەدى.