ۇيعىر تەاترى ەلباسىنىڭ ساياسي بەينەسىن سيپاتتايتىن قويىلىمنىڭ تۇساۋىن كەستى

None
None
استانا. قازاقپارات - ەلوردانىڭ استاناعا اۋىسۋ تاريحى مەن ونداعى ەلباسىنىڭ ساياسي بەينەسىن سيپاتتايتىن، «استانا» پۋبليسيستيكالىق دراماسىنىڭ تۇساۋكەسەرى ءوتتى، دەپ حابارلايدى قازاقپارات ءتىلشىسى.

بۇگىن ەلباسى نۇرسۇلتان نازاربايەۆتىڭ كوركەم بەينەسى ۇيعىر تەاترىنىڭ ساحناسىندا كورىنىس تاپتى.

پرەزيدەنت نۇرسۇلتان نازاربايەۆتىڭ ساياسي ەرىك-جىگەرىنىڭ ارقاسىندا ۇلى دالاداعى مىڭجىلدىقتار توعىسىندا جاڭا قازاقستاندى بەينەلەيتىن تاماشا قالا قۇرىلعانى بارشامىزعا ايان.

ق ر مادەنيەت جانە سپورت مينيسترلىگىنىڭ قولداۋىمەن ق. قوجامياروۆ اتىنداعى ۇيعىر مۋزىكالىق كومەديا تەاترى استانا قالاسىنىڭ 20 جىلدىق مەرەيتويى اياسىندا كورەرمەندەر نازارىنا نۇرسۇلتان نازاربايەۆتىڭ «قازاقستان جولى» كىتابى بويىنشا «استانا» پۋبليسيستيكالىق سپەكتاكلىن ۇسىندى.

قويىلىمدا استانانى اۋىستىرۋ مەن سالۋداعى ەلباسىنىڭ قاھارماندىعى مەن كەمەڭگەر كورەگەندىگى، سونداي-اق، ونىڭ جۇيرىك ويلاۋ وبرازى ۇيعىر تەاترى ساحناسىندا تۇڭعىش رەت قويىلۋدا.

«استانا تاريحىن ەلباسى ەسىمىمەن بايلانىستىرا قاراۋ، جاڭا قالا سالىپ، ەلوردانى كوشىرۋ پرەزيدەنتتىڭ يدەياسى ەكەنىن بىلەمىز. سونىمەن قاتار، ەلوردانى اۋىستىرۋدا ەلباسىمەن كەلىسپەگەن كوپتەگەن قارسىلىقتاردىڭ دا بولعانىن بىلەمىز. العاشقى الاساپىران كەزدەگى قيىنشىلىقتار مەن پروبلەمالار كەڭىنەن ويلاپ، ناقتى پىكىر تۇيۋگە مۇرشا بەرمەسە دە، دانىشپان ەلباسىنى كوكەيىندە تۇنعان وي مەن اڭسارلى ارمان ۇنەمى الاڭداتۋمەن بولدى. ەلوردانى وتانىمىزدىڭ ورتالىق بولىگىنە كوشىرۋدىڭ اسا ماڭىزدى ستراتەگيالىق ساياسي- الەۋمەتتىك، قوعامدىق رۋحانياتتىق ماڭىزى داۋ تۋعىزبايتىن شىندىق ەدى»، - دەيدى «استانا» قويىلىمىنىڭ يدەيا اۆتورى جانە قويۋشى رەجيسسەرى، ق ر حالىق ءارتىسى مۇرات احماديەۆ.

ونىڭ ايتۋىنشا، استانانى كوشىرۋ باستاماسى بىردەن قولداۋ تاپپاسا دا، ەلباسىنىڭ تاباندىلىعىنىڭ ارقاسىندا ەشبىر كەدەرگىگە، كۇدىكتەرگە قاراماستان، ارقا توسىندە اسەم شاھار بوي كوتەردى. جاس استانانىڭ جەتىستىگىنە دەگەن سەنىم قازاقستان حالقىنىڭ قولداۋىنا ۇلاستى، ول جاۋاپتى ساياسي شەشىمدى قولدادى. رەجيسسەر ايتقانداي شىعارمانىڭ مەڭزەۋى دە سوعان سايادى.

ەلورداداعى «بەيبىتشىلىك جانە كەلىسىم» سارايىنىڭ تورىندە قويىلعان «استانا» پۋبليسيستيكالىق سپەكتاكلىنە تەاتر ۇجىمى جارتى جىلعا جۋىق دايىندالعان جانە ساحنالاۋعا 90-عا جۋىق ءارتىس قاتىسۋدا.

سوڭعى جاڭالىقتار