اۋەدە اقاۋ تابىلعان قازاقستان ۇشاعىندا ەكى ادام زارداپ شەكتى
ەسكە سالا كەتەيىك، 11 - قاراشا كۇنى «ەير استانا» اۋە كومپانياسىنىڭ ەمبراەر-190 ۇشاعىنان پورتۋگاليادا تەحنيكالىق قىزمەتتەن كەيىنگى ۇشۋ كەزىندە تەحنيكالىق اقاۋ تابىلىپ، ەكيپاج پورتۋگاليانىڭ بەجا قالاسىنداعى اەرودرومعا قونۋعا ءماجبۇر بولعان ەدى.
«بريتانيالىق ينجەنەردىڭ توبىعىنا زاقىم ءتيىپ، ال قازاقستاندىق ينجەنەردىڭ ارتەريالىق قان قىسىمى كوتەرىلگەن. ولارعا مەديتسينالىق كومەك كورسەتىلدى، اۋرۋحاناعا جاتقىزۋدىڭ قاجەتى جوق» ، - دەيدى ارنايى ۇيىمداستىرىلعان باسپا ءسوز ءماسليحاتىندا اۋە كومپانياسىنىڭ پرەزيدەنتى پيتەر فوستەر.
ول وقىس وقيعاعا قاتىستى تەكسەرىستەردىڭ ناتيجەسى قالاي بولارىن الدىن الا بولجاۋ مۇمكىن ەمەس ەكەنىن، دەگەنمەن كومپانياداعى دەرەكتەرگە قاراي كەيبىر قورىتىندىلاردى ايتۋعا بولاتىنىن تىلگە تيەك ەتتى.
«بىرىنشىدەن، ۇشاقتى باقىلاۋداعى قيىندىقتار OGMA كومپانياسى جۇرگىزگەن جوندەۋ جۇمىستارىنىڭ تىكەلەي سالدارى. ەكىنشىدەن، كاپيتان اۋشيەۆ قولىنان كەلگەنىن ىستەپ، ۇشاقتى قاۋىپسىز قوندىرعان ءارى ارىپتەستەرىنىڭ دە جانىن امان ساقتاپ قالعان» ، - دەدى ول.
قازىرگى كەزدە اۋە كومپانياسى توعىز Embraer ۇشاعىن پايدالانادى. Air Astana وكىلدەرىنىڭ ايتۋىنشا، الدىمەن وقىس وقيعانىڭ ناقتى سەبەپتەرىن ايقىنداۋ قاجەت، قالعان ۇشاقتاردى تەكسەرۋ قاجەت پە، جوق پا - بۇل تۋرالى شەشىمدى كومپانيا سودان كەيىن شىعارادى.