وسكەمەن قالاسىندا كوشەگە امىرەنىڭ اتى بەرىلدى
كۇن تارتىبىنە وبلىس ورتالىعىنداعى 12 كوشەنىڭ اتىن اۋىستىرۋ تۋرالى ماسەلە قويىلدى. وكتيابر كوشەسىنە مۇحامەتجان تىنىشپايەۆتىڭ، كرۋپسكايا كوشەسىنە ەۆگەني برۋسيلوۆسكيدىڭ، ريەۆوليۋتسيوننايا كوشەسىنە قاليحان ىسقاقتىڭ، سوۆەتسكايا كوشەلەرىنە ادولف يانۋشكيەۆيچ پەن الەكساندر زاتايەۆيچتىڭ، دزەرجينسكي كوشەسىنە امىرە قاشاۋبايەۆتىڭ، كيروۆ كوشەسىنە انتون چەحوۆتىڭ، وردجونيكيدزە كوشەسىنە ساعادات نۇرماعامبەتوۆتىڭ، كۋيبىشەۆ كوشەسىنە نارىن اتاۋىن، كالينين كوشەسىنە شىڭعىستاۋ اتاۋىن بەرۋ تۋرالى ۇسىنىستى قالالىق ءماسليحات دەپۋتاتتارى ءبىراۋىزدان قولداپ، رەسپۋبليكالىق ونوماستيكالىق كوميسسيانىڭ قاراۋىنا جىبەردى.
اتاۋى وزگەرگەن كوشەلەردىڭ ىشىندە كەڭەستىك كەزەڭنەن قالعان ەسكى اتاۋلارمەن قوسا تاۋەلسىزدىك جىلدارىندا قايتا اتالعان كوشەلەر دە بار. قالادا ەكىنشى دۇنيەجۇزىلىك سوعىس باتىرى ءىزعۇتتى ايتىقوۆتىڭ اتىندا ەكى بىردەي كوشە بار ەكەنى ايتىلىپ، ونىڭ بىرىنە اسار دەگەن قازاقتىڭ كيەلى اتاۋى بەرىلدى. ال 2002 -جىلى اتاۋى وزگەرگەن گولوۆكوۆ كوشەسى اراعا 16 جىل سالىپ بەيبىتشىلىك دەگەن اتاۋعا يە بولدى.
«2002 -جىلى وسكەمەننىڭ يدەولوگياسىندا كەشىرىلمەس قاتەلىك كەتكەن بولاتىن. ەلىمىز تاۋەلسىزدىگىن جاريالاپ، مەملەكەتتىڭ ىرگەسىن قالاپ جاتقان كەزدە شىعىس قازاقستاننىڭ ءبىر بولىگىن رەسەيگە قوسىپ بەرۋ تۋرالى ۇسىنىس ايتىپ، حالىقتىڭ بەرەكەسىن بۇزعان ادامنىڭ ءبىرى وسى گولوۆكوۆ بولاتىن. كەيىن پارلامەنت تورىندە وتىرىپ، قازاق تىلىنە مەملەكەتتىك ءتىل ستاتۋسىن بەرۋگە قارسىلىق تانىتقان. ەلدىڭ اراسىنا ىرىتكى سالعان ادامنىڭ اتىنداعى كوشەگە بەيبىتشىلىك اتاۋىنىڭ بەرىلۋىن ادىلدىكتىڭ ورناۋى دەپ ءتۇسىنۋ كەرەك» - دەيدى «التاي اسۋى» قوعامدىق بىرلەستىگىنىڭ تەڭ ءتوراعاسى ءتۇسىپحان تۇسىپبەكوۆ.