ۇلتتىق بانك ءتوراعاسى دەپۋتاتتاردىڭ ۇسىنىسىنان باس تارتتى

استانا. قازاقپارات - قازاقستانداعى قۇرىلىس كومپانيالارىنىڭ كوبى پايدالانۋعا بەرىلمەي جاتىپ-اق، سالىپ جاتقان كوپقاباتتى تۇرعىن ءۇيدىڭ پاتەرلەرىن ۇلەسكەرلىك تارتىپپەن ساتىپ جىبەرەتىنى بەلگىلى.

ءماجىلىس دەپۋتاتتارى ناقتى وسى ماسەلە ەلىمىزدە جاڭا تۇرعىن ۇيلەردىڭ جەتىسپەۋشىلىگىن تۋدىرىپ، «7-20-25» باعدارلاماسىنىڭ ورىندالۋىن شەكتەپ وتىرعانىن ايتىپ دابىل قاعۋدا، دەپ حابارلايدى قازاقپارات ءتىلشىسى.

ايتا كەتسەك، بۇعان دەيىن «نۇر وتان» پارتياسى اتىنان ءبىرقاتار ماجىلىسمەندەر (سابيليانوۆ، ايسينا، ماكەن، قۇرمانوۆا، ماحامبەتوۆ) ۇلتتىق بانك ءتوراعاسىنا ۇسىنىس جولداعان بولاتىن. ولاردىڭ ايتۋىنشا، «7-20-25» باعدارلاماسى بويىنشا ادامدار تەك جاڭادان سالىنعان باسپانانى تەك سالۋشى كومپانيالاردان عانا ساتىپ الا الادى.

دەپۋتاتتاردىڭ پايىمىنشا، باعدارلامانى جۇزەگە اسىرۋداعى باستى كەدەرگى - وسى تالاپ.

«2017-جىلدىڭ كورسەتكىشى بويىنشا، جەكە كومپانيالار كوپقاباتتى تۇرعىن ۇيلەردىڭ قۇرىلىسىنا 348 ميلليارد تەڭگە ينۆەستيتسيا سالعان. ول سومانىڭ 188 ميلليارد تەڭگەسى - ۇلەسكەرلەردىڭ اقشاسى. ياعني، جاڭادان سالىنعان كوپقاباتتى تۇرعىن ءۇي پايدالانۋعا بەرىلمەي تۇرىپ-اق، سول ۇيدەگى پاتەرلەردىڭ جارتىسى جەكە تۇلعالارعا ساتىلىپ كەتەدى. بۇل جاعداي «7-20-25» باعدارلاماسى بويىنشا ازاماتتاردىڭ باسپانا الۋ مۇمكىندىگىن ايتارلىقتاي شەكتەيدى»، - دەدى دەپۋتاتتار.

ق ر جىلجىمايتىن مۇلىك بويىنشا اگەنتتىگىنىڭ مالىمەتتەرى بويىنشا، ءۇي سالۋشى كومپانيالار پاتەرلەردىڭ 80-90 پايىزىن پايدالانۋعا بەرمەي جاتىپ ساتىپ جىبەرەدى. وسىدان بارىپ جاڭا ۇيلەردىڭ جەتىسپەۋشىلىگى سەزىلەدى.

«مىنە، سوندىقتان باعدارلامانىڭ سالۋشى كومپانيالاردان جاڭا باسپانانى ساتىپ الۋ تۋرالى تالابىن - قايتالاما نارىقتا ۇلەسكەرلەردەن باسپانانى ساتىپ الۋ مۇمكىندىگىمەن تولىقتىرۋ كەرەك. جوعارىدا ايتىلعانداردى ەسكەرە وتىرىپ، ۇلتتىق بانك ۇكىمەتپەن بىرلەسىپ، ۇلەسكەرلىك قۇرىلىس نەگىزىندە ۇلەسكەرلەر يە بولعان قايتالاما باسپانانى ساتىپ الۋعا جول اشار تىڭ مەحانيزمدى قۇرۋى كەرەك. ول ءۇيدىڭ قۇرىلىسىنىڭ مەرزىمى ءۇش جىلدان اسپاعان بولۋى ءتيىس. قايتالاما نارىقتاعى بۇل وزگەرىس حالىقتىڭ باسىم بولىگىن باعدارلاماعا تارتارى انىق»، - دەيدى ماجىلىسمەندەر».

ءماجىلىس دەپۋتاتتارىنىڭ بۇل ۇسىنىسىنا دانيار اقىشەۆ كەلەسىدەي جاۋاپ بەرگەن.

«ۇلەستىك قۇرىلىس ساتىسىندا تۇرعىن ءۇيدى ساتىپ الۋعا قاراجاتى بار ءبىر ازاماتتاردىڭ «7-20-25» باعدارلاماسى بويىنشا باسقا ازاماتتارعا ءۇيدى قايتا ساتۋ مۇمكىندىگىن بەرەتىن تەتىكتى ەنگىزۋ ءادىل ەمەس دەپ ەسەپتەيمىز. سەبەبى، مامىلەنى الىپساتارلىق ماقساتتا جۇزەگە اسىرۋى مۇمكىن ازاماتتاردىڭ بەلگىلى توبى ءۇشىن بۇل - انىق ارتىقشىلىقتى جاسايدى. سوندىقتان ۇلتتىق بانك بۇل ۇسىنىستى قولدامايدى»، - دەلىنگەن دانيار اقىشەۆتىڭ جاۋابىندا.

ونىڭ جاۋابىنا سۇيەنسەك، بولاشاقتا قۇرىلىس كومپانيالارىنىڭ كوبىنەسە تۇرعىن ءۇيدى پايدالانۋعا بەرگەننەن كەيىن ساتۋ تەتىگىن ىنتالاندىرۋ ارقىلى ازاماتتاردىڭ مۇددەلەرىن قورعاۋ بويىنشا شارالار بارىنشا ءتيىمدى بولماق.

«ۇلتتىق بانك باعدارلامادان تىس «باسپانا حيت» قوسىمشا يپوتەكالىق ءونىمدى ىسكە قوستى. وندا قايتالاما تۇرعىن ءۇيدى مىنا تالاپتارمەن ساتىپ الۋدى نەسيەلەۋ كوزدەلگەن: باستاپقى جارنا - تۇرعىن ءۇي قۇنىنان 20 پايىزدان باستاپ، قارىز مەرزىمى -15 جىلعا دەيىن، نەسيە بويىنشا مولشەرلەمە جىلدىق 11,0 پايىزدى قۇرايدى (ۇلتتىق بانكتىڭ بازالىق مولشەرلەمەسى جانە 1,75 پايىز). استانا، الماتى، اقتاۋ جانە اتىراۋ قالالارى ءۇشىن ساتىپ الىناتىن تۇرعىن ءۇيدىڭ ەڭ جوعارى قۇنى 25 ميلليون تەڭگەنى، باسقا وڭىرلەر ءۇشىن - 15 ميلليون تەڭگە بولادى. قوسىمشا يپوتەكالىق ءونىم بويىنشا تۇرعىن ءۇي قارىزدارىن بەرۋدى جۋىق ارادا باعدارلاماعا قاتىسۋشى بانكتەر جۇزەگە اسىراتىن بولادى»، - دەيدى دانيار اقىشەۆ.