ا ق ش- تاعى الەم چەمپيوناتى: قازاقستاندىق پاۋەرليفتەر الەم رەكوردتارىن ورناتتى

استانا. قازاقپارات - ا ق ش- تىڭ لاس-ۆەگاس قالاسىندا ءوتىپ جاتقان پاۋەرليفتينگتەن الەم چەمپيوناتى مارەسىنە جەتتى.

ەل نامىسىن قورعاۋعا اتتانعان جالعىز قازاقستاندىق، 21 جاستاعى يسپانديار قايىرجان الەمنىڭ ەكى رەكوردىن جاڭارتتى، دەپ حابارلايدى قازاقپارات Sports.kz-كە سىلتەمە جاساپ.

«جاستار اراسىندا (20-23 جاس ارالىعىندا) 67,5 كەلىگە دەيىنگى سالماق ساناتىندا ەكى مەدال الدىم. كلاسسيكالىق بىتىمگە تارتۋ ديۆيزيونىندا جەكە جاتتىعۋ بويىنشا (Deadlift Only) چەمپيون اتانىپ، كلاسسيكالىق ءۇش سايىستا (Classic RAW) كۇمىس مەدالعا قول جەتكىزدىم. ءوز سالماعىم - 61,5 كەلى بولا تۇرا، وتىرىپ كوتەرۋدەن 185 كەلى، جاتىپ كوتەرۋدەن 125 كەلى، بىتىمگە تارتۋدان 220 كەلى تاستى باعىندىرىپ، ءۇش سايىستىڭ قورىتىندىسى بويىنشا 530 كەلى جينادىم. جاتىپ كوتەرۋ جانە بىتىمگە تارتۋدان الەم رەكوردىن ورناتتىم. بەس جىل دەگەندە العاش رەت الەم چەمپيوناتىنىڭ التىن مەدالىن الدىم»، - دەيدى سپورتشى.