شىعىس قازاقستان وبلىسى مەن التاي رەسپۋبليكاسى تۋريزمدى بىرلەسىپ دامىتپاق
مەموراندۋمعا قول قويۋ ءراسىمى پەتروپاۆلدا وتكەن قازاقستان- رەسەي ءوڭىرارالىق ىنتىماقتاستىعىنىڭ XV فورۋمى اياسىندا ءوتتى، دەپ حابارلايدى قازاقپارات altaynews.kz سايتىنا سىلتەمە جاساپ.
اتالعان قۇجات شىعىس قازاقستان مەن التاي رەسپۋبليكاسىنىڭ ساۋدا-ەكونوميكالىق، مادەني-الەۋمەتتىك، اقپاراتتىق، كولىكتىك، سونداي-اق اۋىل شارۋاشىلىعى سالالارىنداعى بايلانىستى جاڭا دەڭگەيگە كوتەرۋگە مۇمكىندىك بەرەدى.
بۇل تۋرالى جۋرناليستەرگە بەرگەن سۇحباتىندا ايماق باسشىسى د. احمەتوۆ ءمالىم ەتتى.
«التاي رەسپۋبليكاسى مەن شىعىس قازاقستان وبلىسىنىڭ ۇقساس تۇستارى كوپ. ءبىزدىڭ مۇددەلەرىمىز دە بىردەي. ەندى ەكى جاققا دا كوپ پايدا تيگىزەتىندەي ءىس-قيمىل جوسپارىن ازىرلەۋىمىز كەرەك. ەڭ الدىمەن، التايلىق ارىپتەستەرىمىزبەن تاۋار اينالىمىمىزدىڭ مولشەرىن ارتتىرۋ جاعىن ويلاستىرۋىمىز قاجەت. بۇگىن كەز كەلگەن مەملەكەتتىڭ دامۋىنا اسەر ەتەتىن فاكتورلاردىڭ ءبىرى - تۋريزم سالاسى. بۇل جاعىنان ەكى ءوڭىردىڭ دە الەۋەتى زور. الداعى ماقساتىمىز شىعىسقازاقستاندىقتار مەن التايلىقتاردىڭ ەش قيىندىقسىز شەكارا اسىپ جۇرۋىنە جاعداي جاساۋ. شىعىس قازاقستان وبلىسى دا، التاي رەسپۋبليكاسى دا قاسيەتتى التاي تاۋلارىنىڭ اۋماعىندا ورنالاسقان. سول سەبەپتى، «التاي - ورتاق ءۇيىمىز» جانە «التاي - تۇركى الەمىنىڭ التىن بەسىگى» اتتى جوبالاردى جۇزەگە اسىرۋدامىز. بولاشاقتا قازاقستان جانە رەسەي جەرىن باسىپ وتەتىن جاڭا تۋريستىك مارشرۋتتار اشۋىمىز كەرەك»، - دەدى وبلىس اكىمى.
دانيال احمەتوۆ سونىمەن قاتار بۇگىندە شىعىستا ەمدەۋ-ساۋىقتىرۋ تۋريزمىن دامىتۋعا باعىتتالعان باعدارلاما ازىرلەنىپ جاتقانىن مالىمدەدى. وڭىردە وقيعالى تۋريزم سالاسىن وركەندەتۋ جوسپارى بار ەكەنىن دە حابارلادى. ءوز كەزەگىندە التاي رەسپۋبليكاسىنىڭ باسشىسى رەسەيلىكتەر قازاقستاندىقتارعا تۋريزم سالاسىندا جان-جاقتى قىزمەت تۇرلەرىن كورسەتۋگە ءازىر ەكەنىن جەتكىزدى.
«قازاقستاندىق ارىپتەستەرىمىزبەن بايلانىسىمىز مىعىم. التاي سىزدەر ءۇشىن دە، ءبىز ءۇشىن دە كيەلى مەكەن، قاستەرلى ۇعىم. كەزىندە ءدال وسى التاي جەرىندە تۇركى قاعاناتىنىڭ نەگىزى قالانعان بولاتىن. سوندىقتان بۇل تۇركىتىلدەس ۇلتتاردىڭ قاي-قايسىسى ءۇشىن دە اتاجۇرت دەۋگە بولادى. مۇزتاۋ تاۋىن ءبىر جارتىسى شىعىس قازاقستان وبلىسىنا قارايدى. دەمەك، شىعىسقازاقستاندىقتارمەن مۇددەمىز دە، قۇندىلىقتارىمىز دا ءبىر»، - دەگەن الەكساندر بەردنيكوۆ شىعىس قازاقستاندىق ينۆەستورلاردى ارىپتەستىككە شاقىردى.