ا ق ش ينۆەستورلارى قوستانايدا جۇگەرى وسىرمەك

قوستاناي. قازاقپارات - قوستاناي وبلىسىنىڭ اكىمى ارحيمەد مۇحامبەتوۆ ا ق ش ينۆەستورلارىمەن كەزدەستى، دەپ حابارلايدى «قازاقپارات» ح ا ا ءتىلشىسى.

بۇعان دەيىن حابارلاعانىمىزداي، قوستاناي وبلىسىنا ا ق ش- تان ينۆەستورلار كەلىپ، ءوڭىردىڭ ەكونوميكالىق الەۋەتىمەن تانىسقان ەدى. دەلەگاتتار اۋىلشارۋاشىلىق ونىمدەرىن وڭدەيتىن جانە ازىق-تۇلىك ونىمدەرىن شىعاراتىن ءبىرقاتار كاسىپورىندا بولىپ ۇلگەردى.

اتاپ ايتقاندا، ولار «م ي ل ح»، «سادچيكوۆسكي»، «قاراسۋ-ەت» سىندى سەرىكتەستىكتەردىڭ جۇمىسىمەن تانىستى. بۇگىن مەيماندار وبلىس اكىمى ارحيمەد مۇحامبەتوۆتىڭ قاتىسۋىمەن ەكىجاقتى ارىپتەستىك ماسەلەلەرىن ورتاعا سالدى. شەتەلدىك دەلەگاتسيامەن بىرگە قوستانايعا KUSTO GROU ديرەكتورلار كەڭەسىنىڭ ءتوراعاسى ەركىن تاتىشەۆ تە كەلدى. ونىڭ سوزىنشە، قوستاناي وبلىسىنىڭ ينۆەستيتسيالىق الەۋەتى وتە جوعارى. سونداي-اق، 10-15 جىل ءونىمدى ىنتىماقتاستىق اياسىندا ءبارى دە وزگەرۋى مۇمكىن.

ەركىن تاتىشەۆ مۇنى ەلگە «شيەۆرون» كومپانياسىنىڭ كىرۋىن جانە قازاقستاننىڭ مۇناي سالاسىنىڭ تولىقتاي وزگەرۋىمەن سالىستىرۋعا بولاتىنىن ايتتى.

ال ا ق ش دەلەگاتسيانىڭ جەتەكشىسى، TysonFreshMeatInc كومپانياسىنىڭ باسشىسى گارولد دين ساندورسكي ءبىزدىڭ وڭىرمەن ارىپتەستىك ورناتۋ تۋرالى جوسپارلارىمەن ءبولىستى.

«بىزدە كۇنىنە 28 مىڭ باس سيىردىڭ ەتىن وڭدەيتىن التى زاۋىت جۇمىس ىستەيدى. ال اپتالىق ونىمدىلىگى - 180 مىڭ باس. وزدەرىڭىز كورىپ وتىرعانداي، بۇل دەگەنىڭىز ەلەۋلى كورسەتكىش. سونىمەن قاتار، شوشقا ەتىن وندىرەتىن جەتى زاۋىت بار، ناقتىلاي ايتقاندا، كۇنىنە 16 مىڭ باس شوشقانىڭ ەتى اتالمىش سەحتار قولىنان وتەدى. بۇعان قوسا، تاۋىق ەتى ءوندىرىسى دە جاقسى جولعا قويىلعان. اپتاسىنا 25 ميلليون باس تاۋىقتىڭ ەتى سۇرانىس نۇكتەلەرىن قاناعاتتاندىرادى. ءبىزدىڭ باستى ماقساتىمىز - زاماناۋي تالاپتارعا جاۋاپ بەرە الاتىن كومپانياعا اينالۋ. سوندىقتان ءبىز سىزدەردىڭ ايماقتارىڭىزعا ينۆەستيتسيا سالىپ، كاسىپتى دامىتا الامىز دەپ ويلايمىن. ءبىر جاعىنان، ايماقتىڭ توپىراعىنىڭ قۇنارلى ەكەنىنە كوزىمىز جەتتى. مول ءونىم بەرۋى مۇمكىن. بۇعان قوسا جاس ماماندارىڭىزدى ءوزىمىزدىڭ تەحنولوگيانىڭ تىلىنە ۇيرەتەمىز، سول ارقىلى ەكى جاققا دا پايدالى ناتيجەلەردى كورەتىنىمىزگە سەنىمدىمىن»، - دەدى گارولد دين ساندورسكي.

ارىپتەستەردىڭ ءبىر كوزدەگەنى وبلىستا يرريگاتسيالىق جۇمىستار جانە جۇگەرىنى ءوسىرۋدى دامىتۋ. ويتكەنى، جەكە كومبيكورم - ا  ق ش كومپانياسى جۇمىسىنىڭ نەگىزگى تىرەگى. وبلىس اكىمى ارحيمەد مۇحامبەتوۆ اتاپ وتكەندەي، بارلىق مەملەكەتتىك قولداۋ شارالارى مىندەتتى تۇردە كورسەتىلەتىن بولادى. ينۆەستورلارعا بارلىق جاعداي جاسالماق.