كاسپي بانك تۋرالى جالعان اقپارات تاراتقان استانالىق كۇدىكتى ۇستالدى
ۇستالعان ازاماتقا ق ر قىلمىستىق كودەكسىنىڭ 274-بابى 2-بولىگىندە قاراستىرىلعان قىلمىستى جاسادى دەگەن ايىپ تاعىلىپ وتىر.
«استانانىڭ 35 جاستاعى تۇرعىنى ۇستىمىزدەگى اي باسىندا الەۋمەتتىك جەلىلەر ارقىلى Kaspi Bank-ءتىڭ قىزمەتى مەن ونىڭ باسشىلىعىنا قاتىستى جالعان اقپارات تاراتتى. قازىرگى ۋاقىتتا پوليتسيا قىزمەتكەرلەرى بارلىق قاجەتتى شۇعىل جانە تەرگەۋ شارالار كەشەنىن جۇرگىزۋدە»، - دەپ ءمالىم ەتتى الماتى پوليتسيا دەپارتامەنتىنىڭ رەسمي وكىلى سالتانات ازىربەك.
سونداي-اق اتالمىش قىلمىسقا قاتىسى بار وزگە دە تۇلعالار انىقتالۋدا.
ەسكە سالايىق، قاراشا ايىنىڭ باسىندا WhatsApp ارقىلى Kaspi Bank- ءتىڭ بانكروتقا ۇشىراعاندىعى تۋرالى اقپارات تاراي باستادى. كەيىن ق ر ىشكى ىستەر مينيسترلىگىنىڭ رەسمي وكىلى الماس سادۋبايەۆ ونىڭ شىندىققا جاناسپايتىندىعىن مالىمدەدى.
«ەل تۇرعىندارىن ارانداتۋشىققا ەرمەۋگە شاقىرامىن. بۇل تاراتىلعان اقپارات شىندىققا جاناسپايدى. قاساقانا جالعان اقپارات تاراتقانى ءۇشىن ەل زاڭناماسىندا قىلمىستىق جاۋاپكەرشىلىك قاراستىرىلعانىن ەسكەرتەمىن. جالعان اقپارات تاراتۋعا قاتىسى بارلاردىڭ بارلىعى انىقتالىپ، جاۋاپكەرشىلىككە تارتىلاتىن بولادى»، - دەدى الماس سادۋبايەۆ.