استانادا اقىلى تۇراقتار اشىلاتىن كوشەلەر بەلگىلى بولدى
ەلوردالىق اكىمدىكتە «استانا قالاسىنىڭ اقىلى كولىك تۇراعى كەڭىستىگىن قۇرۋ، پايدالانۋ جانە باسقارۋ» جوباسى بويىنشا «استانا قالاسىنىڭ كولىك جانە جول- كولىك ينفراقۇرىلىمىن دامىتۋ» م م مەن «استانانىڭ كولىك تۇراعى كەڭىستىگى» ج ش س اراسىنداعى مەملەكەتتىك- جەكەشەلىك ارىپتەستىك تۋرالى ورتاق شارتقا قول قويىلدى.
ايتا كەتكەن ءجون، بۇل ەلوردانىڭ كولىكتىك ينفراقۇرىلىمىن دامىتۋ ستراتەگياسى اياسىندا استانانىڭ كولىك كەڭىستىگىن باسقارۋعا اۆتوماتتاندىرۋ جۇيەسىن ەنگىزۋدەگى العاشقى جوبا.
مەملەكەتتىك ورگان مەن جەكە سەرىكتەس اراسىنداعى ارىپتەستىك ەلوردادا ءبىرىڭعاي كولىك تۇراعى كەڭىستىگىن قۇرۋ مەن ۇيىمداستىرۋدى قاراستىرادى.
«جوبانىڭ بىرەگەيلىگى - ءبىز اقىلى تۇراق نارىعىن قالىپتاستىرۋدامىز. قازىر مەملەكەتتىك ارىپتەسپەن بىرلەسە، اقىلى تۇراققا بولىنگەن جەر ۋچاسكەلەرىن راسىمدەۋمەن اينالىسىپ جاتىرمىز. ايتا كەتەتىن جايت، العاشقى تۇراقتاردى ىسكە قوسقالى تەك 10 ايدان كەيىن عانا تولەمدەردىڭ %22 كورسەتكىشىنە قول جەتكىزدىك. كەلەسى كەزەڭدى جۇزەگە اسىرۋعا ينۆەستور ءوز قارجىسىن قۇياتىن بولادى، - دەدى «استانانىڭ كولىك تۇراعى كەڭىستىگى» ج ش س ديرەكتورى ارداق تۇرعانقۇلوۆ.
اقىلى تۇراقتاردى ىسكە قوسۋدىڭ كەلەسى كەزەڭى سول جاعالاۋدا - د. قونايەۆ، دوستىق كوشەلەرى، وڭ جاعالاۋدا - كەنەسارى، بەيبىتشىلىك، س. سەيفۋللين، جەلتوقسان، جەڭىس كوشەلەرىندە جۇزەگە اسىرىلادى.
ا. تۇرعانقۇلوۆتىڭ ايتۋىنشا، تۇراق ايماقتارىن ۇيىمداستىرىپ، جول بەلگىلەرى مەن اقپاراتتىق تاقتالاردى ورنالاستىرۋعا بەلگىلى ۋاقىت كەتەدى. سونداي- اق جەكە ينۆەستور وكىلى قالا تۇرعىندارىن جول بەلگىلەرى مەن جاڭا اقپاراتتىق تاقتالارعا مۇقيات بولۋعا شاقىرادى.
«ءبىز مىندەتتى تۇردە ءبىر اي بۇرىن كولىك يەلەرىن حاباردار ەتەمىز. اقىلى تۇراق بولاتىن جەرلەرگە الدىن الا بۇل جەردىڭ اقىلى بولاتىنى جايلى ەسكەرتەتىن اقپاراتتىق تاقتالار ىلىنەدى»، - دەپ اتاپ ءوتتى ا. تۇرعانقۇلوۆ.
ەستەرىڭىزگە سالا كەتەيىك، پيلوتتىق رەجىمدەگى جوبا 2018 -جىلدىڭ 15 -قاڭتارىنان باستاپ نۇرلىجول جەلەكجولىندا ىسكە قوسىلدى. اكىمشىلىك ورتالىقتا 487-ايماقتىڭ 24 ى سەرتيفيكاتتالعان ارنايى جابدىقتارمەن - پاركومات، جول بەلگىلەرى، اقپاراتتىق تاقتا جانە تاڭبالارمەن جابدىقتالىپ، اقىلى بولدى.
استاناداعى جول- كولىك تورابىنىڭ العاشقى اقىلى كوممۋنالدىق تۇراق قىزمەتىن وتكەن 9 ايدا 500 مىڭنان استام جۇرگىزۋشى پايدالانعان، دەگەنمەن، تۇراق قىزمەتى تولەمىنىڭ 94 مىڭ عانا دەرەگى تىركەلگەن. تۇراق ەرەجەلەرىن بۇزعان 23 مىڭ كولىك جۇرگىزۋشىسى ايىپپۇل قاعازدارىن الدى.
ايتا كەتەيىك، ۇلى وتان سوعىسىنىڭ ارداگەرلەرى، ءبىرىنشى جانە ەكىنشى توپ مۇگەدەكتەرى، «التىن قىران» جانە «حالىق قاھارمانى» وردەندەرىنىڭ يەگەرلەرى، «التىن القا» جانە «كۇمىس القامەن» ماراپاتتالعان كوپ بالالى انالار، سەمەي يادرولىق پوليگونىنداعى جارىلىستاردان زارداپ شەككەندەر، سونداي- اق اۋعانستانداعى جانە باسقا دا جاۋىنگەرلىك ارەكەتتەر ارداگەرلەرى مەن مۇگەدەكتەرىنە تىركەلگەن اۆتوكولىكتەر اكىمدىك بەكىتكەن اقىلى تۇراقتاردى پايدالانۋ ەرەجەسىنە سايكەس، ونى تەگىن پايدالانۋ قۇقىعىنا يە.
ەستەرىڭىزگە سالا كەتەيىك، جوعارىدا اتالعان ازاماتتار جەڭىلدىككە يە بولۋ قۇقىقتارىن تىركەۋ ءۇشىن جۇمىس كۇندەرى ساعات 08:00-دەن 20:00-گە دەيىن شارل دە گولل كوشەسى، 1ا مەكەنجايى بويىنشا كەلۋى قاجەت. قاجەت قۇجاتتار ءتىزىمى 2888.kz سايتىندا كورسەتىلگەن. سۇراقتار بويىنشا جۇمىس كۇندەرى 88000802888 تەگىن تەلەفونىنا حابارلاسا الاسىزدار.