قازاقستان ەتى ا ق ش-قا ەكسپورتتالماق

قوستاناي. قازاقپارات - قوستاناي وبلىسىنىڭ ينۆەستيسيالىق الەۋەتىمەن تانىسۋ ءۇشىن ا ق ش كاسىپكەرلەرى كەلدى، دەپ حابارلايدى قازاقپارات.

قوستاناي وبلىسىنا ا ق ش-تان 18 دەلەگات كەلدى. مەيماندار ساپارىنىڭ ماقساتى - توبىل ءوڭىرىنىڭ اگروونەركاسىپ كەشەنىنە تيەسىلى جوبالاردى جۇزەگە اسىرۋ مۇمكىندىكتەرىمەن تانىسۋ.

دەلەگاتسيا قۇرامىندا Tyson Fresh Meat Inc.، Global Beef Investors, ANIMART Dairy  جانە Livestock Solutions, VALLEY، VALMONT Irrigation, 3rd Millennium Genetics LLC سىندى بەلگىلى الەمدىك كومپانيالاردىڭ جەتەكشىلەرى مەن اكسيونەرلەرى جانە قازاقستاندىق كاسىپكەر، KUSTO GROUP ديرەكتورلار كەڭەسىنىڭ ءتوراعاسى ەركىن تاتىشەۆ بار. ايتا كەتەيىك، Tyson Fresh Meat Inc - سيىر جانە شوشقا ەتىن جەتكىزۋشى الەمدەگى كوشباسشى كومپانيالاردىڭ ءبىرى.

جۇمىس ساپارىنىڭ باعدارلاماسى بويىنشا دەلەگاتتار ءوڭىردىڭ كوپتەگەن الەۋەتتى نىسانىن ارالايدى. قوناقتار بۇگىننىڭ وزىندە اۋىلشارۋاشىلىق ونىمدەرىن وڭدەيتىن جانە ازىق- تۇلىك ونىمدەرىن وندىرەتىن ءبىرقاتار كاسىپورىندا بولىپ ۇلگەردى.

اتاپ ايتقاندا، ولار «ميلح»، «سادچيكوۆسكي» ، «قاراسۋ- ەت» سىندى سەرىكتەستىكتەردىڭ جۇمىسىمەن تانىستى. وبلىس اكىمىنىڭ ءبىرىنشى ورىنباسارى عاۋەز نۇرمۇحامبەتوۆ پەن وبلىس اكىمىنىڭ ورىنباسارى مەيىرجان مىرزاليەۆ قوستاناي قالاسىنداعى يندۋستريالىق ايماقتا دەلەگاتسيامەن كەزدەسۋ وتكىزدى.

ول جەردە مەيماندارعا وبلىستىڭ ينۆەستيتسيالىق الەۋەتى تانىستىرىلىپ، ءوڭىردىڭ اوك دامىتۋدىڭ باسىم باعىتتارى مەن ينۆەستجوبالاردى ىسكە اسىرۋعا كورسەتىلىپ وتىرعان مەملەكەتتىك قولداۋ شارالارى تۋرالى مالىمدەلدى. اسىرەسە، اۋىل شارۋاشىلىعى داقىلدارىن وڭدەۋ تۇرعىسىندا كەڭ ماعلۇمات بەرىلدى.

ينۆەستورلار ءوڭىردىڭ ۇلكەن الەۋەتكە يە ەكەنىنە كوز جەتكىزگەندەرىن ايتتى. وعان قوسا، بارلىق جاعداي، باي رەسۋرس، شيكىزاتتىق بازا جانە مەملەكەت تاراپىنان تولىق قولداۋدىڭ بارىنا وڭ باعا بەردى. جالپى، دەلەگاتسيا تەك ەت سالاسىندا عانا ەمەس، وسىمدىك داقىلدارىن وسىرۋدە، ءسۇت ونىمدەرىن وندىرۋدە جانە ت. ب. جوبالاردى جۇزەگە اسىرۋ مۇمكىندىكتەرىن قاراستىرادى.