پەتروپاۆلداعى كورمەدە تابيعاتتى تاماشالاۋعا ارنالعان ءمولدىر قوناق ءۇي تانىستىرىلدى

پەتروپاۆل. قازاقپارات - پەتروپاۆلدا قازاقستان مەن رەسەيدىڭ ايماقارالىق ىنتىماقتاستىق فورۋمى اياسىندا تۋريستىك كورمە جۇمىس ىستەپ تۇر، دەپ حابارلايدى قازاقپارات ءتىلشىسى.

بۇل كورمەدە رەسەيدىڭ ومبى وبلىسى دا ءوز الەۋەتىن كورسەتتى. شەكارالاس وبلىستان كەلگەن قوناقتار سولتۇستىك قازاقستان جۇرتىنا بولاشاقتىڭ قوناق ءۇيىن الا كەلىپتى. ول - ءمولدىر شار تارىزدەس ەكو- قوناق ءۇي. ومبىلىقتار مۇنداي ەكوتۋريزمعا سۇرانىس كوپ بولاتىنىنا سەنىمدى.

ومبى وبلىستىق تۋريستىك- اقپاراتتىق ورتالىعى باسشىسىنىڭ ورىنباسارى ۆاسيلي دەديۋحيننىڭ ايتۋىنشا، مۇنداي ەكو- قوناق ۇيلەر فرانسيادا كەڭ تارالعان. ال رەسەيدە كوپ ادام ونى تۇسىنە بەرمەيدى.

«مۇنداي قوناق ءۇيدىڭ بىرەگەي ەرەكشەلىگى - تابيعاتپەن وڭاشا قالۋعا مۇمكىندىك بەرەتىندىگىندە. ول، اسىرەسە، مەگاپوليس تۇرعىندارى ءۇشىن تاپتىرماس دۇنيە. قوناق ءۇي تولىعىمەن ءموپ- ءمولدىر. مىنا ۇلگىدە ىشىندە ورىندىق بار، ءبىراق ونىڭ ورنىنا كەرەۋەت قويۋعا دا بولادى. بۇل قوناق ءۇي ەكى ادامعا ارنالعان»، - دەپ ءتۇسىندىردى ۆ. دەديۋحين.

 يننوۆاتسيالىق شاتىرلار جىلۋدى ساقتاپ تۇرادى. 15 گرادۋس ايازعا دەيىن توتەپ بەرەدى. ەكو- قوناق ءۇيدى چەليابىدە نەمەسە فرانسيادان تاپسىرىس بەرىپ، الدىرۋعا بولادى. دەگەنمەن، ۆ. دەديۋحيننىڭ سوزىنشە، قۇنى ءۇش ەسە قىمباتقا تۇسەتىنىن ەسكەرۋ كەرەك. شامامەن 500 مىڭ رەسەي رۋبلىن جۇمساۋعا تۋرا كەلەدى.

«ومبى وبلىسى ەكوتۋريزمگە باسا نازار اۋدارىپ وتىر. كەلەشەكتە وسىنداي قوناق ۇيلەردەن تۇراتىن كەشەن اشقىمىز كەلەدى. ازىرگە بيزنەس- جوسپار جاسالعان جوق. مۇمكىن، كورمەدەن كەيىن بۇل ماسەلە كوبىرەك ايتىلىپ، وزەكتىلىگى ارتا تۇسەتىن شىعار. بۇگىننىڭ وزىندە كوپ ادام قىزىعۋشىلىق تانىتىپ، ىشىنە كىرىپ كورىپ جاتىر. مۇنىڭ ءوزى - جەتىستىك»، - دەيدى ۆ. دەديۋحين.

كورمەگە 40-تان استام ەكسپونات قويىلعان. ءارقايسىسىنڭ تاڭعالدىرارلىق ەرەكشەلىگى بار.