امەريكالىق كورپوراتسيا ءىرى جوباسىن جۇزەگە اسىرۋ ءۇشىن قاراعاندى وبلىسىن تاڭدادى
كەزدەسۋ بارىسىندا مال ءوسىرۋ سالاسىنا قاتىستى اۋقىمدى جوبانى ىسكە اسىرۋ ماسەلەلەرى تالقىلاندى، دەپ حابارلايدى وبلىستىق اكىمدىكتىڭ باسپا ءسوز قىزمەتى.
امەريكالىق كومپانيا ايماعىمىزدا شوشقا ءوسىرۋ سالاسىندا عىلىمي-زەرتتەۋ گەنەتيكالىق سەلەكتسيالىق-گيبريدتىك ورتالىق قۇرۋعا كىرىستى. اتالمىش جوبانى ىسكە اسىرۋ قازاقستانعا جاڭا ەكسپورتتىق مۇمكىندىكتەر بەرەدى.
ورتالىق قۇرىلىسىنا بۇقار جىراۋ اۋدانىنىڭ شەشەنقارا اۋىلىنىڭ ماڭىندا 200 گەكتار جەر بولىنگەن. قازىر قارجىلاندىرۋ جانە مەملەكەتتىك قولداۋ ماسەلەلەرى تالقىلانۋدا. جوبا قىمبات تۇرادى: ونىڭ قۇنى - 16 ميلليارد تەڭگەدەن اسادى.
- ءۇش جىلدىڭ ارالىعىندا ءبىز وسى جوبانى قازاقستاندا جۇزەگە اسىرۋدىڭ الەۋەتتەرىن ساراپتاپ شىقتىق. ءبىز گەنەتيكالىق ماتاريالدى ءوسىرۋ ءۇشىن الەم بويىنشا ءتۇرلى لوكاتسيالاردى قاراپ شىقتىق. جۇمىس كۇشىنىڭ، بوس جەر تەلىمدەرىنىڭ بولۋى سەكىلدى اسپەكتىلەر قاراستىرىلدى. الايدا ەڭ باستىسى - جەم بازاسى تۇرعىسىنان شىعىنداردىڭ تيىمدىلىگى. جانەدە بۇل تۇرعىدا قازاقستان ۇلكەن ارتىقشىلىقتارعا يە، - دەدى AGCO اعا ۆيتسە-پرەزيدەنتى توماس ف. ۆەلكە.
بيزنەسمەن رەسپۋبليكادا، ونىڭ ىشىندە قاراعاندى وبلىسىندا ينۆەستيتسيالىق كليمات جاعىمدى ەكەنىن اتاپ ءوتتى.
ونىڭ ايتۋىنشا، وسى سەكىلدى كاسىپورىندار ۆەتنام مەن فيليپپيندە بار، جانە ءدال وسىنداي ورتالىق سالىنعان سوڭ، قازاقستان دا سول ەلدەرمەن باسەكەلەسە الادى. شوشقا ەتىن ءتيىمدى ەكسپورتتاۋ نارىعى قىتاي مەن رەسەي بولاتىنىن انىقتاعان. ال گەنەتيكالىق ماتەريالدى ەۋروپادان ساتىپ الۋ جوسپارلانىپ وتىر.
بيزنەسمەن الەمدىك تەحنولوگيالار مەن بىلىمدەر ترانسفەرتىنە باسىمدىلىق جاسايتىندارىنا ۋادە بەردى.
- ءبىز وبلىس باسشىلىعىنان قولداۋ تاپتىق. ءبىرقاتار ماسەلەلەردى ورتالىق دەڭگەيدە شەشۋ كەرەك: قارجىلاندىرۋ جانە سۋبسيديا الۋ كەزەڭدەرى بويىنشا - بۇل الەمدىك نارىقتاعى باسەكەلەستىك تۇرعىسىندا ماڭىزدى. وسى ماسەلەلەردى شەشكەن سوڭ، قۇرىلىستى باستاۋعا جارتى جىل ۋاقىت قاجەت بولادى. سونداي-اق قۇرىلىس جۇمىستارىنىڭ ءوزى 18 ايعا سوزىلادى، - دەپ مالىمدەدى كورپوراتسيا وكىلى.
ەرلان قوشانوۆ قۇزىرلى ماماندارعا ينۆەستور جوبانى سوڭىنا دەيىن جەتكىزۋىنە كومەك كورسەتۋىن تاپسىردى.
- بۇل تەك ءبىزدىڭ وبلىس ءۇشىن عانا ەمەس، جالپى رەسپۋبليكامىز ءۇشىن وتە ءتيىمدى جوبا. جانەدە ءبىز ونىڭ جۇزەگە اسىرىلۋىنا قىزىعۋشىلىق تانىتىپ وتىرمىز. قولداۋ كورسەتىپ جاتىرمىز جانە ءارى قاراي دا جاردەمدەسەمىز - ول ءۇشىن مەملەكەتتىك مەحانيزمدەر بار، - دەپ اتاپ ءوتتى ايماق باسشىسى.
AGCO كورپوراتسياسىنىڭ كەڭسەسى ا ق ش يللينويس شتاتىنىڭ Assumption قالاسىندا ورنالاسقان.