ۇلى بريتانيانى العاش رەت اينالىپ ءجۇزىپ شىققان كىم؟

 استانا. قازاقپارات - اعىلشىن ازاماتى روسس ەدجلي  ۇلى بريتانيا ارالىن اينالىپ ءجۇزىپ شىققان تاريحتاعى العاشقى ادام رەتىندە گيننەستىڭ رەكوردتار كىتابىنا كىردى.

33 جاستاعى ەدجلي ساياحاتىن 1 -ماۋسىمدا مارگيت قالاسىنان باستاعان. جولدا وعان كاسىبي تەڭىزشى مەتتيۋ نايت ارنايى قايىقپەن ەرىپ وتىرىپ، كومەكتەسكەن. نايت ونىڭ دۇرىس تاماقتانۋى مەن قالىپتى ۇيىقتاۋىن باقىلاپ وتىرعان. ەدجلي كۇنىنە 12 ساعاتتا ورتاشا ەسەپپەن 12 شاقىرىم جۇزگەن. رەكوردشى ءبىر كۇندە ەڭ ۇزاق 33,4 شاقىرىم جۇزە العان.

بۇل قاشىقتىقتى ول 5 ساعات 25 مينۋتتا باعىندىرعان. نايتتىڭ ايتۋىنشا، ەدجلي جىلدامدىعىن ساعاتىنا 16 شاقىرىمعا دەيىن ارتتىرعان.

«مۇنداي جىلدامدىقپەن ادام ەمەس، دەلفيندەر جۇزەدى» دەيدى نايت. ەدجلي لا- مانش بۇعازىن، يرلاند تەڭىزى، اتلانت مۇحيتىنىڭ ءبىر بولىگىن 157 كۇن ىشىندە جالپى 2857 شاقىرىمدى ءجۇزىپ وتكەن. وسى ۋاقىت ارالىعىندا ول بىردە-ءبىر رەت جاعالاۋعا شىقپاعان.



 ەدجلي جولدا بىرنەشە كەدەرگىلەرگە ۇشىراعان. تەڭىز داۋىلىنان باستاپ، قاۋىپتى مەدۋزا شابۋىلىنان بەت كۇيۋى جاراقاتى سىندى قيىندىقتاردى باستان وتكەرگەن. روسس جولدا 500 مىڭنان ارتىق كالوريا جوعالتىپ، سونىڭ ورنىن تولتىرۋ ءۇشىن 640 دانادان كوپ بانان جەگەن.



«جولدا ءتۇرلى كەدەرگىلەرگە ۇشىرادىم. بەتىمە ۋلى مەدۋزا جابىسىپ، كوزىم كورمەي قالدى. ونى بەتىمنەن الىپ تاستاۋ وڭاي بولعان جوق. سونىڭ سالدارىنان قولىم كۇيىپ قالدى. بريستول شىعاناعىنداعى قاتتى اعىسپەن ارپالىسۋ قيىن بولدى. سونداي قيىن شاقتا ماعان كيت كومەككە كەلدى. ول مەنى جارالانعان يتبالىق دەپ ويلادى. سوندىقتان اعىستان شىعىپ كەتكەنشە 8 شاقىرىم بويى سۇيەمەلدەپ وتىردى. كيتكە قاتتى ريزا بولدىم»، -  دەپ ەستەلىگىمەن ءبولىستى ەدجلي.

رەكوردشىنىڭ ومىرىنە بىرنەشە رەت قاۋىپ تونگەن. لەندس- ەندكە كەلگەندە تۇزدى سۋدىڭ اسەرىنەن ءتىلى ءىسىپ كەتىپ، دەم الا الماي قالا جازداعان. 4 -قاراشا، جەرگىلىكتى ۋاقىت بويىنشا ساعات 09:00-دە كەنت گرافتىعىنداعى مارگيت قالاسىنىڭ تۇرعىندارى  ۇلى بريتانيا ارالىن تۇڭعىش رەت اينالىپ ءجۇزىپ شىققان ەدجلي روسستى كۇتىپ الۋ ءۇشىن جاعالاۋعا جينالعان. جەرگىلىكتى تۇرعىنداردىڭ ىشىنەن 300 ادام ونى قولداۋ ءۇشىن جاعالاۋعا 500 مەتر قالعاندا ەدجليمەن بىرگە جۇزگەن.

جاعالاۋعا امان-ەسەن شىققان رەكوردشى ءجۇزۋدى 100 كۇنگە جوسپارلاعانىن، قيىندىقتارعا بايلانىستى 57 كۇنگە كەشىككەنى سەبەپتى تۋىستارى مەن سۇيگەنىنەن كەشىرىم سۇراعانىن ايتتى.

ايتا كەتەيىك، روسس ەدجلي بىرىنشە رەت گيننەستىڭ رەكوردتار كىتابىنا كىرىپ وتىرعان جوق. 2016 -جىلى 19,5 ساعات ىشىندە 42 شاقىرىمدىق قاشىقتىقتى ارقاسىنا 1,4 توننالىق ماشينانى بايلاپ ءجۇزىپ ءوتىپ رەكورد ورناتقان. وسىدان 2 اي وتكەن سوڭ، جوعارىعا بايلانعان ارقانعا بىرنەشە مىڭ رەت ورمەلەپ شىعىپ، جالپى ەسەپتە ءوز دەنەسىن ەۆەرەست شىڭىنا تەڭ بيىكتىككە الىپ شىعا العان ءبىرىنشى ادام رەتىندە گيننەستىڭ رەكوردتار كىتابىنا ەنگەن.