ماڭعىستاۋدا ەجەلگى ادام قاڭقالارى تابىلدى
بۇل تۋرالى ماڭعىستاۋ تاريحي- مادەني قورىعىنىڭ ارحەولوگيا جانە ارحيتەكتۋرا ءبولىمىنىڭ جەتەكشىسى بەرىك تولەگەن ۇلى ايتتى، دەپ حابارلايدى قازاقپارات ءتىلشىسى.
بەرىك تولەگەن ۇلىنىڭ ايتۋىنشا، ادام قاڭقالارى تابىلدى دەگەن اقپاراتتى ماڭعىستاۋ اۋدانىنىڭ ءىىب قىزمەتكەرلەرى حابارلاعان. ولارعا مۇنداي جاڭالىقتى قۇرىلىسشىلار ايتىپتى.
«ادام قاڭقالارى ماڭعىستاۋ اۋدانىنداعى جىڭعىلدى سەلوسىنا قاراستى «ەگىن اۋىل» ەلدى- مەكەنىنىڭ جانىنداعى توبەدەن سۋ قۇبىرىنا ارنالعان ترانشەيا قازۋ كەزىندە تابىلعان. ەكسكاۆاتورمەن جەردى قازۋ كەزىندە 1,8 م تەرەڭدىكتەن سۇيەكتەر شىعا باستاعان. سول ۋاقىتتا قۇرىلىسشىلار تابىلعان سۇيەكتى قاراماق بولىپ، ۇيىندىلەردى تۇرتكەندە ترانشەيانىڭ ءبىر بولىگىندەگى بور تاستى جار كەزدەيسوق وپىرىلىپ 80x80 س م قۋىس پايدا بولعان. قۋىستىڭ ىشىنەن 3 ادامنىڭ قاڭقالارى جاتقانىن كورىپ، دەرەۋ پوليتسيا قىزمەتكەرلەرىنە حابارلاعان. اتالعان قۋىستىڭ ەكى جاعىندا 1-2 مەتر ارالىقتا دا سۇيەكتىڭ بولىكتەرى كەزدەسەدى»، - دەيدى بەرىك تولەگەن ۇلى.
ق ر «تاريحي- مادەني قورعاۋ جانە پايدالانۋ» تۋرالى زاڭىنا سايكەس، ول جەردە قۇرىلىس جۇمىستارى ۋاقىتشا توقتالىتىلىپ، پوليتسيا قىزمەتكەرلەرىنە تۇسىنىكتەمە بەرىلگەن.
ماماننىڭ ايتۋىنشا، جەرلەۋ ورنى تۋرالى تولىق اقپارات الۋ ءۇشىن ارحەولوگيالىق قازبا جۇمىستارى جۇرگىزىلۋ كەرەك. تەك 25 -قازان كۇنى وڭىردەگى بىلىكتى مامان، ارحەولوگ ا. استافيەۆتىڭ قاتىسۋىمەن وقيعا ورنىندا اپاتتىق- قۇتقارۋ جۇمىستارى جۇرگىزىلگەن.
ترانشەيا بويىنداعى قابىرعالاردا كاتاكومبا جەرلەۋ كەشەنى ەسىكتەرىنە ۇقساس بەلگىلەر بايقالادى.
ترانشەيانىڭ بويىنان 8 كاتاكومبانىڭ ەسىگى بار كورىنەدى. سونداي-اق، تازالاۋ جۇمىستارى كەزىندە بىرنەشە ادامنىڭ قاڭقالارى تاعى تابىلعان.
«ەسكەرتكىش تۋرالى ناقتى اقپارات بەرۋ قيىن، ول جاعى زەرتتەلۋى كەرەك. ءبىراق الدىن- الا بولجام بويىنشا، جەرلەۋ راسىمدەرىنە سايكەس، بۇل ءبىزدىڭ زامانىمىزدىڭ I- V عاسىرلارى ارالىعىنا تيەسىلى بولۋى مۇمكىن. بۇعان دەيىندە ولكە ارحەولوگتارى كاتاكومبالىق جەرلەۋ ورىندارىن وبلىس اۋماعىندا سىرلىتام، شاعاتاي، قۇمىرا اتتى ەسكەرتكىشتەردى تاپقان بولاتىن. الايدا «جىڭعىلدى» كاتاكومباسىنىڭ ولاردان ەرەكشەلىگى جەرلەۋ بولمەلەرىنىڭ كوپتىگىندە. سەبەبى كاتاكومبانى تابۋدىڭ ءوزى ۇلكەن ولجا.
اتالعان ەسكەرتكىشتىڭ بۇرىن تابىلعان ەسكەرتكىشتەرىمەن ۇقساستىعىن ەسكەرە وتىرىپ، «جىڭعىلدى» دەپ اتالاتىن كاتاكومبالىق جەرلەۋ ورنىن تولىققاندى زەرتتەۋ قاجەت»، - دەيدى وبلىستىق ماڭعىستاۋ تاريحي- مادەني قورىعىنىڭ ارحەولوگيا جانە ارحيتەكتۋرا ءبولىمىنىڭ جەتەكشىسى.