امەريكاداعى قازاق دارىگەرى شىمكەنتتە كۇردەلى وتالار جاسادى

شىمكەنت. قازاقپارات - امەريكادا تۇراتىن قازاق دارىگەرى شىمكەنتتە جەرگىلىكتى ماماندارمەن تاجىريبە ءبولىستى.

پروفەسسور جولداس قۇلجانوۆ جەرگىلىكتى حيرۋرگتارمەن جاراقاتتان ساۋ-تامتىعى قالماعان اعزانى قايتا قالپىنا كەلتىرۋ بويىنشا كۇردەلى وتالار جاسادى، دەپ حابارلايدى قازاقپارات ءتىلشىسى.

جولداس قۇلجانوۆ ءۇش كۇندىك ساپارى بارىسىندا جەرگىلىكتى دارىگەرلەرگە شەبەرلىك ساباقتار وتكىزەدى. سونداي-اق سۇيەكتەردىڭ زاقىمدانۋىنان زارداپ شەگىپ جۇرگەن ناۋقاستارعا تەگىن كەڭەس بەرمەك.

بۇگىن شەتەلدىك قازاق دارىگەرىمەن شىمكەنت قالالىق دەنساۋلىق ساقتاۋ باسقارماسى جانە وڭتۇستىك مەديتسينا اكادەمياسى ءۇشجاقتى كەلىسىمگە قول قويدى. تاراپتار مەموراندۋم اياسىندا ارالاس اۋىر جاراقاتتاردى ەمدەۋ جانە قالپىنا كەلتىرۋ جونىندەگى مەديتسينالىق شارالاردى بىرلەسىپ جۇزەگە اسىرماق.

ايتا كەتەيىك، مەديتسينا عىلىمىنىڭ دوكتورى، پروفەسسور جولداس قۇلجانوۆ 26 جىل بويى امەريكادا ەڭبەك ەتىپ كەلەدى. سەگىز ءتىلدى مەڭگەرگەن، الەمنىڭ 42 ەلىندە بولعان. ا ق ش- قا كەلگەنگە دەيىن بەس جىل نيكاراگۋادا جۇمىس ىستەگەن. بۇگىندە ا ق ش- تىڭ ميسسۋري شتاتى، سەنت-لۋيس قالاسىندا ۋنيۆەرسيتەتتىك ەمحانانىڭ ورتوپەديا دەپارتامەنتىنىڭ باسشىسى، ا ق ش- تىڭ ورتوپەديا جانە تراۆماتولوگيا قاۋىمداستىعىنىڭ جانە ASAMI مۇشەسى.