ەلوردادا وقۋشىلار قوقىستى بولەك جيناۋدى ۇيرەندى

استانا. قازاقپارات - استانادا تۇرمىستىق قالدىقتى بولەك جيناۋعا قاتىستى جوبانىڭ ەكىنشى كەزەڭى باستالدى، دەپ حابارلايدى قازاقپارات اكىمدىكتىڭ سايتىنا سىلتەمە جاساپ.

27 -قازاننان باستاپ قالدىقتاردى ەكىنشى رەت جيناقتاۋ ءۇشىن قالانىڭ بارلىق مەكتەپتەرىنە سارى كونتەينەرلەر ورناتىلا باستادى.

قالانىڭ 30 مەكتەبىندە «Vپەرەرابوتكۋ» اكسياسى بويىنشا وقىتۋ باستالدى. № 14 -مەكتەپ- گيمنازيادا وقۋشىلار مەن اتا- انالار ءۇشىن قالدىقتى بولەك جيناۋعا ارنالعان تاقىرىپتىق ساباق ءوتتى.

«بۇل شارا بالالاردى ۇلگىلى بولۋعا، قوقىستى بولەك جيناۋدىڭ مادەنيەتى مەن قورشاعان ورتانى سىيلاۋدى ۇيرەتەدى. بۇل اۋلامىزدىڭ، قالامىزدىڭ قالا بەردى الەمنىڭ تازالىعىن ساقتاۋ ءۇشىن ماڭىزدى» ، - دەدى قوعامدىق باستامالاردى دامىتۋ قورى ءتوراعاسىنىڭ ورىنباسارى اسەل مۇقانوۆا. قورشاعان ورتانى قورعاۋ جانە تابيعات پايدالانۋ باسقارماسىنىڭ باس مامانى اينۇر سولتانعۇلوۆا بالالارعا جوبانىڭ ءمانىن ءتۇسىندىردى.

«شيكىزاتتى قايتادان وڭدەۋگە بولادى، ياعني مەتالل، شىنى، قاعازدان جاڭا ءونىم دايىندالادى. مىسالى 7 پلاستيك بوتەلكەدەن ءبىر فۋتبول فورماسىن جاساۋعا بولادى، Nike كومپانياسى وسىنداي اكتسيا ۇيىمداستىردى. مۇنداي باستاما الەمدە كوپ، سىزدەر جاستار قورشاعان ورتانى جاقسارتۋعا ۇلەس قوسىڭىزدار»، - دەدى ول.

قالدىقتى بولەك جيناۋ بويىنشا كونكۋرستا جەڭىمپازعا ءبىر سەبەت الما بەرىلدى.

№ 14-مەكتەپ- گيمنازيانىڭ ديرەكتورى ولەگ نادەين قوقىستىڭ «ەكىنشى شيكىزات» ەكەنىن، ونىڭ قايتا وڭدەۋگە بولاتىنىن ايتتى.

«ءبىز بۇرىن تاستاي سالاتىن قوقىستاردان وزگە ماتەريال وندىرۋگە بولادى. بۇگىندە ءبىزدىڭ الدىمىزدا قوقىستى تاستاي سالماي سۇرىپتاپ، وڭدەۋ مىندەتى تۇر. وقۋشىلار قالدىقتى بولەك جيناۋعا ادەتتەنسە قوعامدا بۇل كەڭىرەك تارايدى. شارانىڭ ارقاسىندا اۋدانىمىز تازارا ءتۇستى»، - دەدى ول.