الەمنىڭ الپاۋىت كومپانياسىندا جۇمىس ىستەيتىن ايگەرىم: قازاقستانداعى جاڭا تەحنولوگيالارمەن تانىسقىم كەلەدى
سەبەبى ول - الەمنىڭ الپاۋىت كومپانياسى Apple-دە جۇمىس ىستەپ جۇرگەن العاشقى قازاق قىزى. قازاقپارات ءتىلشىسى ايگەرىممەن شەتەلدەگى تۇرمىس جانە ۇلتتىق قۇندىلىقتار تۋرالى سۇحباتتاسقان ەدى.
- ايگەرىم، سىزدەي سۇلۋ قازاق قىزىنىڭ مۇحيتتىڭ ار جاعىندا تابىستى ەڭبەك ەتىپ جۇرگەنىن كورىپ قۋاندىق. ۇلان- باتور سايتتارى «موڭعوليادان شىققان ايگەرىم الەمگە تانىلدى» دەپ سۇيىنشىلەپ جازدى. قازاقتار «Apple» كومپانياسىندا ىستەيتىن جالعىز قازاق قىزى» دەيدى. وسى جايىندا ايتىپ وتسەڭىز؟
- راحمەت، Apple كومپانياسىندا موڭعوليادان كەلگەن العاشقى قازاق ينجەنەر قىزى بولىپ جۇمىس ىستەپ جۇرگەنىم راس. وسىنداعى ارىپتەستەرىم دە مەنى موڭعول ەلىنەن كەلگەن قازاق قىزى دەپ بىلەدى.
- ءوزىڭىز تۋرالى ايتىپ بەرىڭىزشى؟ قايدا وقىدىڭىز؟ امەريكاعا قالاي جول ءتۇستى؟
- موڭعوليادا تۋىپ-ءوستىم. امەريكا قۇراما شتاتتارىندا «كومپيۋتەر عىلىمى» ماماندىعى بويىنشا ءبىلىم العان ەدىم. مەكتەپ بىتىرەردە قاتارىنان بىرنەشە جوعارى وقۋ ورىندارىنا مەكتەپتەگى جەتىستىكتەرىم تۋرالى قۇجاتتار مەن سەرتيفيكاتتار جىبەرىپ، ەمتيحان تاپسىردىم. ناتيجەسىندە جاپونيا، تۇركيا، رەسەي جانە اقش ۋنيۆەرسيتەتتەرىنەن شاقىرتۋ العانمىن. اقىلداسا كەلە، ا ق ش- تىڭ حيۋستون قالاسىنداعى سولتۇستىك امەريكا ۋنيۆەرسيتەتىن تاڭدادىق.
- رەسەيمەن شەكارالاس اقكولدە تۋعانىڭىزدى، بايان- ولگەيدەگى موڭعول- تۇرىك ليتسەيىندە وقىعانىڭىزدى بىلدىك. بۇگىنگى سۇحباتتى قازاق تىلىندە جۇرگىزىپ وتىرمىز. جالپى ءوزىڭىز نەشە ءتىلدى مەڭگەردىڭىز؟
- مەنىڭ انا ءتىلىم - قازاق ءتىلى. سونىمەن بىرگە، موڭعول، اعىلشىن جانە تۇرىك تىلدەرىندە جەتىك سويلەيمىن.
- باعدارلامالىق جاساقتاما ينجەنەرى بولۋ - كەز كەلگەن قىزدىڭ جۇرەگى داۋالامايتىن سالا. وسىنداي كۇردەلى ماماندىققا قالاي كەلدىڭىز؟ قىزىعۋشىلىق قايدان باستالدى؟
- بالا كۇنىمنەن بۇلىنگەن زاتتى قۇراستىرىپ- جوندەۋگە بەيىم بولدىم. كەيىننەن كومپيۋتەرلىك باعدارلاماعا اۋەستەندىم. كومپيۋتەر عىلىمى تۋىنداعان ماسەلەنى لوگيكا رەتىندە قولدانىپ، جۇيەلى تۇردە شەشەدى عوي. سوندىقتان وسى ەرەكشەلىكتەرگە قاراي قۇشتار بولدىم. بۇل سالا الەمدى ءبىر- بىرىنە جاقىنداتىپ قانا قويماي، مەديتسينا، عىلىم- ءبىلىم، ساياسات، ونەر سىندى باسقا سالالاردىڭ دا قارىشتاپ دامۋىنا ۇلەس قوسىپ وتىر.
ال سۇراعىڭىزعا كەلسەك، ءيا مۇنداي سالادا قىزدار از. مەن دە العاشىندا جۇرەكسىندىم. ءبىراق انام «سەنىڭ قولىڭنان كەلەدى، سەندە ۇلكەن ءتوزىم مەن پوتەنتسيال بار» دەپ ۇنەمى قولداپ وتىردى. جەتىستىگىمنىڭ ءبارى انامنىڭ وسىنداي قولداۋىنان دەپ ويلايمىن.
- ا ق ش- تان قازاقستان جاستارىن كەزىكتىردىڭىز بە؟ بايان-ولگەيدەگى قازاق جاستارى مەن قازاقستاندا تۋىپ-وسكەن جاستاردىڭ ايىرماشىلىعى بار ما؟
- مەن ءوزىم قازاقستانعا بارىپ كورگەن ەمەسپىن. ءبىراق، مۇندا قازاقستاننان كەلگەن كوپتەگەن دوستارىم بار. ولار امەريكادا ءار ءتۇرلى سالادا تابىستى ەڭبەك ەتىپ ءجۇر. موڭعوليادا تۋىپ- وسكەن قازاق جاستارى شەتتە جۇرسە دە، سالت- ءداستۇر مەن ءتىلىن جاقسى ساقتاپ قالعان دەر ەدىم.
- قازاقستاندى قالاي ەلەستەتەسىز؟ قازاقستان دەگەندە كوز الدىڭىزعا قانداي سۋرەت كەلەدى؟
- قىزىق سۇراق. كەڭ بايتاق دالانى كورەمىن جانە تاريحىن ساقتاپ قالعان ءارى جاڭاشىلدىققا ۇمتىلعان دامۋ ۇستىندەگى ەل ەلەستەيدى. قازاقستاندا بولماسام دا، جاڭالىقتاردان قاراپ جۇرەمىن. استانا، ەكسپو، بايتەرەك تۋرالى انامنان ەستۋىم بار. انام وتكەن جىلى استاناعا دۇنيەجۇزى قازاقتارىنىڭ 5 -قۇرىلتايى مەن ەكسپو-2017 كورمەسىنە بارعان جانە كەرەمەت اسەرمەن ورالعان.
- كوپتەگەن جاس ماماندار «Apple» سياقتى الپاۋىت كومپانيالاردا قىزمەت ەتۋدى ارماندايدى. سول ارمان ورىندالۋى ءۇشىن نە ىستەۋى كەرەك؟
- قانداي دا ءبىر ءىستى يگەرۋ قابىلەتى جوعارى بولۋى ءۇشىن ەڭ الدىمەن ىزدەنىس جانە العا قويعان ماقساتقا بەرىك بولۋ قاجەت دەپ ويلايمىن. تۇراقتى كىتاپ وقۋ دا جاستاردىڭ ءوزىن دامىتۋىنىڭ كىلتى. ەڭ باستىسى - ادام ءوزىن- ءوزى الداماۋى كەرەك جانە ەڭبەك ەتۋدەن ەش ايانباۋى قاجەت.
- ءسىزدىڭ جەرلەسىڭىز بۇركىتشى قىز ايشولپان قازاقستانعا شاقىرتۋ الدى جانە استانا مەكتەبىندە وقىپ جاتىر. سىزگە دە قازاقستانعا شاقىرتۋ تۇسسە قالاي قابىلدار ەدىڭىز؟
- ارينە، كەلەشەكتە قازاقستانعا بارىپ، تەحنولوگيا سالاسىنداعى قىزمەتتەرىمەن تانىسۋ جوسپارىمدا بار.
- قازاقتىڭ قانداي سالت- ءداستۇرىن تۇرمىستا قولداناسىزدار؟ قانداي تاعامداردى ءسۇيىپ ازىرلەيسىزدەر؟
- اتا-اجەمنىڭ قولىندا وسكەندىكتەن، ۇلكەندى سىيلاۋ، وزگەلەرگە كومەكتەسۋ، قاراپايىم جانە ەڭبەكقور بولۋدى كۇندەلىكتى ومىردە ىسكە اسىرىپ ۇيرەندىم. سۇيىكتى تاعامدارىم - ارينە، انام دايىنداعان قازاقشا ەت، مانتى جانە ءسۇت قوسىلعان ءدامدى ءشايى. ال قازىر اناممەن بىرگە بوس ۋاقىتىمىزدا ءتۇرلى دەسەرت، ءۇندى تاعامدارىن ازىرلەۋدى ۇيرەنىپ ءجۇرمىز.
- الەۋمەتتىك جەلىدە اناڭىزدىڭ جانە ءوزىڭىزدىڭ دە ءان ايتاتىن ونەرىڭىزدى كوردىك. قازىرگى قازاق شوۋ- بيزنەسىن تاماشالايسىز با؟
- ءيا، مەنىڭ انام جۋرناليست جانە موڭعوليا ەلىنىڭ مادەنيەت سالاسىنىڭ ۇزدىگى. ءان ايتۋ دا انامنان دارىعان تالانت. قازاق شوۋ-بيزنەسىنەن «دەنيس تەن جانە ونىڭ دوستارى» جوباسىن ءسۇيسىنىپ كورۋشى ەدىم. الەمنىڭ ەڭ ۇزدىك مانەرلەپ سىرعاناۋشىلارىنىڭ قازاقتىڭ ۇلتتىق كيىمىمەن، شاڭقوبىزدىڭ، دومبىرانىڭ ۇنىندە بيلەۋى - وتە اسەرلى شىعادى. دەنيستەي تالانتتى ادامنىڭ ومىردەن ەرتە وتكەنى وكىنىشتى. تاعى ءبىر سۇيىكتى قازاقستاندىق ونەرپازىم - ديماش قۇدايبەرگەن. ونىڭ ءار ەلدە قويعان كونسەرتتەرىن ينتەرنەت ارقىلى ۇدايى كورەمىن.
- امەريكا - بىرنەشە ۇلت پەن مادەنيەتتىڭ توعىسقان ەلى. دەسە دە، ومىرلىك جارىڭىزدىڭ ۇلتىنا ءمان بەرەسىز بە؟
- شىنىمدى ايتسام، ول جايلى ويلاپ كورمەپپىن. قازىر تەك قانا ءبىلىم الۋ، تاجىريبە جيناۋ، ءوزىمدى جان- جاقتى دامىتۋعا كۇش سالىپ جاتىرمىن. بارلىعىن ۋاقىت كورسەتەدى.
- سۇحباتىڭىز ءۇشىن كوپ راحمەت، ايگەرىم! سىزبەن قازاقستاندا كورىسۋگە قۇشتارمىز!