ەلوردالىقتار اقمولانىڭ ەتى مەن ىرىمشىگىن جاپپاي ساتىپ الىپ جاتىر
جارمەڭكەدە اقمولا وبلىسىنىڭ 2 قالاسى مەن 17 اۋدانىنان 100-دەن استام اۋىلشارۋاشىلىق تاۋار وندىرۋشىلەر مەن وڭدەۋشى كاسىپورىندار باس قالا تۇرعىندارىنا ءوز ءونىمىن ۇسىنىپ وتىر.
بۇل جولى اقمولا وبلىسىنىڭ اگروونەركاسىپتىك كەشەندەرى 373,5 ميلليون تەڭگەگە 730,5 توننانى قۇرايتىن ءتۇرلى ءونىم تۇرلەرىن اكەلدى، بارلىق تاۋارلار قالا بازارلارىنداعى باعالاردان %15-20 عا تومەن. سونىڭ ىشىندە: ەت جانە شۇجىق ونىمدەرى - 174 توننا، بالىق جانە بالىق ونىمدەرى - 10,2 توننا، جۇمىرتقا - 2,5 ميلليون دانا، ءسۇت جانە ءسۇت ونىمدەرى - 34,3 توننا، ۇن - 50 توننا، وسىمدىك مايى - 15 مىڭ ليتر، كارتوپ - 300 توننا، باسقا ونىمدەر - 9,5 توننا.
«اقمولالىق جارمەڭكەدە كوبىنە ەت جانە ەت ونىمدەرىن جاقسى الىپ جاتىر. سونىمەن قاتار، ءسۇت ونىمدەرى دە ەلوردالىقتاردىڭ سۇرانىسىنا يە. جارمەڭكەدە كوپ وتەتىن تاعى ءبىر تانىمال ءونىم - جاقسى اۋدانىنىن شىعارىلاتىن ىرىمشىك. ونى نەگە ءبارى جاقسى كورەدى؟ ويتكەنى ىرىمشىك جوعارى ساپاعا جاۋاپ بەرەتىن گوللانديالىق وزىق تەحنولوگيامەن وندىرىلەدى. جالپى، جارمەڭكە باعاسى استانالىق نارىقپەن سالىستىرعاندا %15-20 عا تومەن»، - دەدى اقمولا وبلىسىنىڭ اۋىل شارۋاشىلىعى باسقارماسىنىڭ باسشىسى ازامات ساعىنبايەۆ.
سونىمەن قاتار، باسقارما باسشىسى وبلىستا سوڭعى ۋاقىتتا كوكونىس ونىمدەرىن ءوسىرۋ كەڭىنەن قولعا الىنىپ جاتقانىن جانە الداعى جىلدارى كوكونىس ءوسىرۋ مەن ساتۋ كولەمىنىڭ ۇلعاياتىنىن ايتىپ ءوتتى.
ەكى كۇنگە سوزىلاتىن جارمەڭكە استاناداعى «قازاقستان» سپورت كەشەنىنىڭ الاڭىندا ءوتىپ جاتىر جانە ونىڭ اياسىندا كونسەرتتىك باعدارلاما ۇيىمداستىرىلۋدا.
