ەلوردادا «ماڭگىلىك ەل يدەياسى: تاريحى مەن بولاشاعى» اتتى كونفەرەنسيا ءوتىپ جاتىر
جيىندى اشقان ق ر تۇڭعىش پرەزيدەنتى - ەلباسى كىتاپحاناسى ديرەكتورىنىڭ ءبىرىنشى ورىنباسارى ءامىرحان راحىمجانوۆتىڭ ايتۋىنشا، بۇل كونفەرەنسيا - كىتاپحانادا وتكىزىلەتىن ءداستۇرلى جانە وتە ماڭىزدى ءىس-شارالاردىڭ ءبىرى.
«ءبىز نەبىر تار جول، تايعاق كەشۋدەن، نەشە ءتۇرلى سىننان، قيامەتتىڭ قىل كوپىرىنەن بىرلىك پەن ىنتىماقتىڭ ارقاسىندا امان وتكەن ەلمىز. سوندىقتان بارىمىزدى باعالاپ، كيەمىزدى قاستەرلەي بىلەتىن، ۇلتىمىزدىڭ باعىنا تۋعان الىپتارىمىزدى ارداقتاپ، قادىرىن تۇسىنەتىن حالىقپىز. شيرەك عاسىر ىشىندە اسقار اسۋلار مەن بيىك بەلەستەردى باعىندىرىپ، ەڭسەلى ەلگە اينالۋىمىز ەلباسىنىڭ كەمەڭگەرلىگى مەن كورەگەندىگىنىڭ ارقاسىندا ەكەنىن ءار قازاقستاندىق جاقسى بىلەدى. ەلباسىنىڭ جىل سايىنعى جولداۋلارىن اسىعا كۇتىپ، ستراتەگيالىق باعدارلامالارى مەن جاھاندىق باستامالارىنىڭ ىسكە اسىرىلۋىنا ءار ۇجىم، ءار ازامات ءوزىنىڭ قال-قادەرىنشە اتسالىسۋعا تىرىسادى»، - دەدى ول.
سەبەبى، ونىڭ پايىمىنشا، ەلىمىز جەتكەن تابىستار مەن بولاشاق جوسپارلار بارلىق ۋاقىتتا دا تۇڭعىش پرەزيدەنتىمىز، ەلباسى نۇرسۇلتان نازاربايەۆتىڭ ەسىمىمەن بايلانىستى.
«ءبىز پرەزيدەنتىمىزدىڭ «ماڭگىلىك ەل» جولىنداعى دانا ساياساتىنىڭ ارقاسىندا بۇگىندە دامىعان ەلدەر قاتارىنا جەتتىك. حالىقارالىق جانە الەمدىك دەڭگەيدە ابىرويلى، بەدەلدى مەملەكەت اتاندىق. كەڭ بايتاق قازاق جەرى تاتۋلىقتىڭ ۇلگىسىنە اينالىپ، دامۋدىڭ قازاقستاندىق جولى قالىپتاستى. ەندى ەگەمەن ەلىمىز دامۋدىڭ جاڭا كەزەڭىنە اياق باستى»، - دەدى ءا. راحىمجانوۆ.
قازاقستاننىڭ ءۇشىنشى جاڭعىرۋى - قوعامنىڭ رۋحاني جاڭارۋى مىندەتتەرى مانماتىنىندە وتكىزىلىپ جاتقان كونفەرەنسيا جۇمىسىنا تانىمال وتاندىق عالىمدار، دوكتورانتتار مەن ماگيسترانتتار قاتىسۋدا. ولار ماڭگىلىك ەل يدەياسىمەن بايلانىستى جۇمىستاردىڭ تاريحي، ەكونوميكالىق، ساياسي، فيلوسوفيالىق، مادەني، الەۋمەتتىك، قۇقىقتىق جانە باسقا دا قىرلارىن تالقىلاپ جاتىر. شارا قورىتىندىسىندا «قازاقستان جولى: ماڭگىلىك ەل» مونوگرافياسىن شىعارۋ جوسپارلانعان.