حالىقارالىق «قاسيەتتى قازاق ەلى» اتتى ونەر فەستيۆالى وتەدى
«قاسيەتتى قازاق ەلى» اتتى حالىقارالىق ونەر فەستيۆالىنىڭ ەرەجەسى
ماقساتى: شەتەلدەگى دارىندى قازاقتاردىڭ قولونەردى، ءسوز ونەرىن، تەرمەشىلىك ءداستۇردى مەڭگەرۋدەگى شىعارماشىلىق شەبەرلىگىنە باسا نازار اۋدارۋ. ولاردىڭ وتانسۇيگىشتىك، رۋحاني، ۇلتتىق ناقىشتا جاسالعان بۇيىمدارىن، ىستەگەن كادەسىيلارىن، ولەڭدەر مەن ورىنداۋشىلىق شەبەرلىگىن ناسيحاتتاۋ.
مىندەتى: ەلباسىنىڭ بيىلعى جولداۋى مەن بەسىنشى قۇرىلتايدا ايتقان كەلەلى ويلارىن شەتەلدەگى قانداستارىمىز بەن ەلگە ورالعان اعايىندار اراسىندا ناسيحاتتاۋ جانە ولاردىڭ ەڭبەگىن كوپشىلىككە جەتكىزۋ.
قولونەر كورمەسىنە قاتىسۋ شارتتارى:
1. قولونەر شەبەرىنىڭ جاسىنا شەكتەۋ جوق
2. اۆتوردىڭ ءومىربايانى، تولىق مەكەن- جايى جانە جۇمىسى، تەلەفونى كورسەتىلۋى كەرەك. ۇيىمداستىرۋشىلار اۆتورلارعا وزدەرى كورسەتكەن بايلانىس تەلەفوندارى ارقىلى حابارلاسادى.
3. ءوزى جاساعان بۇيىمدارىن فەستيۆالدە تانىستىرۋى، جاساۋ بارىسىن كورسەتۋى، ونىڭ قازاق حالقىنىڭ ومىرىندە الار ورنى جايلى تولىق مالىمەت بەرۋى كەرەك
4. جاساعان بۇيىمى، كادەسىيى زاماناۋي، كۇندەلىكتى تۇرمىستا قولدانۋعا لايىقتى بولۋى كەرەك
5. ءاربىر اۆتوردىڭ جاساعان بۇيىمى تالاپقا ساي بولىپ، سانى 5-7 دەن اسپاۋى كەرەك.
ءمۇشايرا مەن تەرمە سايىسىنىڭ شارتى:
1. ءمۇشايرا مەن تەرمە سايىسىنا شەتەلدە تۇراتىن جانە ەلىمىزدەن تىس ايماقتاردا تۋىپ- ءوسىپ، قازىر اتاجۇرتقا ورالعان قازاق اقىندارى مەن جىرشى- تەرمەشىلەرى قاتىسا الادى.
2. اقىننىڭ شىعارماسى بۇرىن ەش جەردە جاريالانباعان بولۋى كەرەك.
3. ءبىر اقىن ءۇش ولەڭمەن قاتىسا الادى.
ءبىرىنشى ولەڭى - اتامەكەن، ەل مەن جەر، ەلدىك، پاتريوتتىق ماسەلەلەر، استانانىڭ 20 -جىلدىعى قاتارلى تاقىرىپتاردا بولۋى مىندەتتى؛
ەكىنشى ولەڭى - قوجابەرگەن باتىردىڭ تۋعانىنا 320 جىل تولۋىنا وراي باتىردىڭ ەرلىگى مەن ءومىرى تۋرالى (مىندەتتى) ؛
ءۇشىنشى ولەڭ - ەركىن تاقىرىپ.
4. تەرمە سايىسى ەركىن تاقىرىپقا قۇرىلادى. تەرمەشىلەردىڭ ورىنداۋشىلىق شەبەرلىگىنە باعا بەرىلەدى.
5. تەرمەشىلەر قانداي تەرمە ورىندايتىنىن الدىن الا حابارلاۋى كەرەك.
6. ولەڭدەر مەن تەرمە تاقىرىپتارى 2018 -جىلدىڭ 1- قاراشاسىنا دەيىن قابىلدانادى.
7. ءادىلقازىلار القاسىنىڭ شەشىمىمەن جەڭىمپازدارعا ارنايى جۇلدە تاعايىندالادى.
فەستيۆالگە شەتەلدەگى دياسپرا وكىلدەرىمەن بىرگە، ەلگە كەلىپ ءوز ونەرىمەن تانىلىپ جۇرگەن ونەرپازدار دا قاتىسادى. تالاپكەرلەر وتەتىن ۋاقىتتان ءبىر اپتا بۇرىن تىركەلىپ ءبىتۋى كەرەك.
بايلانىس نومەرى: 87011230279 ديدار بولات. 87017521183 قارلىعاش بەكپاتشا قىزى.
Baq.kz