موڭعوليانىڭ بايان- ولگي ايماعىندا تۇراتىن ونەرتاپقىش ءۇي جىلىتۋعا ارنالعان ەرەكشە پەش ويلاپ تاپتى
امانبول قۇماربەك ۇلى جاڭا پەشتىڭ ەرەكشەلىگى تۋرالى ساعاتتاپ ايتۋعا بار. ويتكەنى، ونى ءوزى ويلاپ تاپقان. كومىردىڭ ۇنتاعىمەن- اق ءۇيدى جىلىتاتىن قوندىرعىنى جاساپ شىققانشا ەكى جىل ۋاقىتى كەتكەن.
امانبول قۇماربەك ۇلى، ونەرتاپقىش:
- ۇساق كومىر بىزدە ارزان بولعاندىقتان، سونى جاعۋ كەرەك، حالىق سونى پايدالانۋ كەرەك. قازىر ول تەككە قالىپ وتىر عوي. ول ارزان، حالىققا ەكونوميكالىق جاعىنان ءتيىمدى. سول جاعىنان ىستەلىپ، شىعىپ جاتىر بۇل پەش.
امانبول ەلەكترشى ماماندىعىن وقىعان. سول العان ءبىلىمى پەشتىڭ باسقارۋ جۇيەسىن جاساعاندا كادەگە جارادى. كومىردىڭ بۋنكەردەن ءتۇسىپ، وتىننىڭ بەلگىلى تەمپەراتۋراعا دەيىن قىزۋىن رەتتەيتىن ەلەكتروندى سحەمانى ءوزى قۇراستىرىپ شىققان. دانەكەرلەگەن دە ءوزى. يننوۆاتسيالىق پەشتى العاشقى بولىپ ساتىپ العانداردىڭ ءبىرى قايروللا قارتان ۇلى. ايتۋىنشا، قازىر 2 قاباتتى ءۇيى قايناپ تۇر. اقشاعا دا ۇنەم، ويتكەنى ۇساق كومىردىڭ باعاسى ارزان.
قايروللا قاتران ۇلى، بايان- ولگي قالاسىنىڭ تۇرعىنى:
- اپاڭ كەلمەيدى، وسىندا اتاسى عانا جۇمىستايدى. اپا جوق، بۇعان كەلۋگە حاقى جوق. ەندى ول قىشقاشىن تاستادى، كۇلمەن الىسپايدى.
امانبول - بايان ولگيدەگى اتاقتى قولونەر شەبەرىنىڭ وتباسىندا دۇنيەگە كەلگەن. اكەسى قۇماربەك قانجارباي ۇلى تەمىردەن ءتۇيىن ءتۇيىپ، تاس، اعاش پەن تەرىدەن ۇلتتىق ناقىشتاعى بۇيىمدار جاسايدى. تاياۋدا عانا جانارمايسىز، سۋ مەن جەلسىز توق ءوندىرىپ تۇراتىن قوندىرعى ويلاپ تاۋىپتى.
قۇماربەك قانجارباي ۇلى، قولونەر شەبەرى:
- قىتاي، ورىس، امەريكا عانا جاسايدى دەگەن ەمەس. قازاق تا دۇنيە جاساي الادى. اتا- بابامىز وسى تاۋ- تاستىڭ ورتاسىندا مال باقتى عوي دەپ، ءبىز دە سويتپەي، وسىنداي پايدالى، يننوۆاتسيالىق قوندىرعى جاساۋعا، قانداي دا ءبىر جاڭالىققا ءۇيىر بولۋىمىز كەرەك. جاستارعا ايتارىم، ىزدەنىس مىقتى بولۋ كەرەك. بىتپەيتىن ءىس جوق. قۇماربەك قانجارباي ۇلىنىڭ 5 ۇلى بار. بارلىعى دا تەمىرگە ءتىل، جاڭقاعا جان بىتىرەتىن شەبەرلەر. ولار جاساعان بۇيىمداردا قازاقى ءيىس اڭقىپ تۇر. ۇلتتىق ناقىش ايقىن سەزىلەدى.
بەرىك كوشەرباي
https://kaztrk.kz