قازاقستاندا ۋنيۆەرسيتەتتىك اۋرۋحانالار قۇرىلادى

استانا. قازاقپارات - قازاقستاندا ۋنيۆەرسيتەتتىك اۋرۋحانالار قۇرىلادى. بۇل تۋرالى بۇگىن ۇكىمەت وتىرىسىندا مەملەكەتتىك- جەكەشەلىك ارىپتەستىكتى دامىتۋ تۋرالى بايانداعان ق ر دەنساۋلىق ساقتاۋ ءمينيسترى ەلجان ءبىرجانوۆ ايتتى، دەپ حابارلايدى قازاقپارات ءتىلشىسى.

 «ۋنيۆەرسيتەتتىك اۋرۋحانالاردى قۇرۋ بويىنشا 3 مەملەكەتتىك- جەكەشەلىك ارىپتەستىك جوباسى جۇمىس ىستەۋدە. ءبىرىنشىسى الماتى قالاسىنداعى ۋنيۆەرسيتەتتىك اۋرۋحانا بويىنشا كونسەسسيالىق ۇسىنىسقا ەكونوميكالىق ساراپتامانىڭ وڭ قورىتىندىسى الىندى، كونكۋرستىق قۇجاتتاما جوباسى ازىرلەنۋدە. قازىرگى ۋاقىتتا جوبانىڭ ينۆەستيتسيالىق تارتىمدىلىعىن ارتتىرۋ ءۇشىن ەۋروپا قايتا قۇرۋ جانە دامۋ بانكىنىڭ حالىقارالىق كونسۋلتانتتارى تارتىلدى»، - دەدى ول.

 ءمينيستردىڭ ايتۋىنشا، قاراعاندى قالاسىنداعى ۋنيۆەرسيتەتتىك اۋرۋحانا بويىنشا ازيا دامۋ بانكىمەن بىرلەسىپ قۇجاتتاما ازىرلەۋ جۇمىستارى جۇرگىزىلىپ جاتىر.

«100 ناقتى قادام» ۇلت جوسپارىنىڭ 78-قادامىن ىسكە اسىرۋ ماقساتىندا جوعارى وقۋ ورىندارىن، ونىڭ ىشىندە قازاق ۇلتتىق مەديتسينا ۋنيۆەرسيتەتى مەن قاراعاندى مەملەكەتتىك مەديتسينا ۋنيۆەرسيتەتىن 100 پايىزى مەملەكەتتىڭ قاتىسۋى بار اكسيونەرلىك ەمەس قوعامدارعا قايتا قۇرۋ بويىنشا جۇمىس جۇرگىزىلۋدە. وسىعان بايلانىستى، قازىرگى ۋاقىتتا ۇلتتىق ەكونوميكا، قارجى مينيسترلىكتەرىمەن جانە ازيا دامۋ بانكىمەن جوبالاردى ىسكە اسىرۋدىڭ ينستيتۋتسيونالدىق سحەماسى، ونىڭ ىشىندە قازاقستان رەسپۋبليكاسىنىڭ زاڭناماسىنا تۇزەتۋلەر ەنگىزۋ ارقىلى پىسىقتالۋدا»، - دەدى ە. ءبىرتانوۆ.

ونىڭ سوزىنە قاراعاندا، قازاق ۇلتتىق مەديتسينا ۋنيۆەرسيتەتىنىڭ جانىنان  1265 توسەكتىك بىرىكتىرىلگەن ۋنيۆەرسيتەتتىك اۋرۋحانانى قۇرۋ جوباسى بويىنشا ۇلتتىق ەكونوميكا مينيسترلىگىنىڭ ينۆەستيتسيالىق ۇسىنىسقا ەكونوميكالىق قورىتىندى بەرىلگەن. 18 - قىركۇيەكتە ق ر ۇكىمەتى مەن حالىقارالىق قارجى ۇيىمدارىنىڭ اراسىنداعى ارىپتەستىك تۋرالى نەگىزدەمەلىك كەلىسىمدەردى ىسكە اسىرۋ جونىندەگى ۇيلەستىرۋ كەڭەسى جوبانى IFC- مەن بىرلەسىپ ىسكە اسىرۋدى ماقۇلدادى.

«قازىرگى ۋاقىتتا دەنساۋلىق ساقتاۋ مينيسترلىگى مەن IFC اراسىنداعى كەلىسىمدى جاساۋ بويىنشا جۇمىس جۇرگىزىلۋدە»، - دەدى مينيستر.

ايتا كەتەيىك، قازىرگى كەزدە دەنساۋلىق ساقتاۋ سالاسىندا مەملەكەتتىك- جەكەشەلىك ارىپتەستىك جوبالارىنىڭ تىزبەسى 3 رەسپۋبليكالىق جانە 258 جەرگىلىكتى ماڭىزدى جوبادان تۇرادى. ونىڭ ىشىندە 68 جوبا بويىنشا شارت جاسالىپ، 193 جوبا دايىندالۋدا. جوبالار دارىگەرلىك امبۋلاتوريالاردى، فەلدشەرلىك- اكۋشەرلىك جانە مەديتسينالىق پۋنكتەردى، ەمحانالاردى، ستاتسيونارلاردى سالۋدى جانە ونى پايدالانۋعا بەرۋدى، مەديتسينالىق تەحنيكامەن جاراقتاندىرۋدى كوزدەيدى.

اۆتور: مارلان جيەمباي