10:12, 24 - قازان 2018 | GMT +6
ازىرەت سۇلتان مەشىتىنە جاڭا باس يمام تاعايىندالدى
استانا. قازاقپارات - ناۋرىزباي قاجى تاعان ۇلى رەسپۋبليكالىق «ازىرەت سۇلتان» مەشىتىنىڭ باس يمامى جانە ق م د ب- نىڭ استانا قالاسىنداعى وكىلى بولىپ تاعايىندالدى، دەپ حابارلايدى قازاقپارات muftyat.kz سايتىنا سىلتەمە جاساپ.
استاناداعى «ازىرەت سۇلتان» مەشىتىندە ق م د ب ءتوراعاسى، باس ءمۇفتي سەرىكباي قاجى ساتىبالدى ۇلىنىڭ قاتىسۋىمەن جينالىس ءوتتى. جيىندا باس ءمۇفتي بۇيرىعىمەن بىرىنشى نايب ءمۇفتي ناۋرىزباي قاجى تاعان ۇلىنىڭ رەسپۋبليكالىق «ازىرەت سۇلتان» مەشىتىنىڭ باس يمامى جانە استانا قالاسىنىڭ وكىلى بولىپ تاعايىندالعانى جاريا ەتىلدى.
جينالىس بارىسىندا باس ءمۇفتي جىل باسىنان بەرگى جاعدايلاردى ساراپتاي كەلە ەلوردامىزدىڭ ءدىني ومىرىنە ىقپالدى وزگەرىستەر ەنگىزىپ، جانداندىرا تۇسۋگە ناۋرىزباي قاجى تاعان ۇلىنداي بىلىكتى باسشىنىڭ قاجەت ەكەنىن اتاپ ءوتتى.
جاقىندا عانا جاڭادان اشىلعان تۇركىستان وبلىسىنداعى ق م د ب كەڭسەسىنىڭ جۇمىسىن دا جولعا قويىپ، جاڭا قۇرىلىمعا جان بىتىرگەن قىزمەتىن دە ايرىقشا باعالايتىنىن اتاپ ءوتتى.