ءۇستىرتتىڭ قازاقستانداعى بولىگىندە قابىلان پايدا بولدى

استانا. قازاقپارات - ءۇستىرتتىڭ قازاقستانداعى بولىگىندە فوتوتۇزاققا قابىلان ءتۇسىپ قالدى. بۇل تۋرالى ق ر ا ش م ورمان شارۋاشىلىعى جانە جانۋارلار الەمى كوميتەتىنىڭ باسپا ءسوز حاتشىسى ساكەن دىلداحمەت جاريا ەتتى، دەپ حابارلايدى قازاقپارات.

«عاجاپ! ءۇستىرت مەملەكەتتىك تابيعي قورىعىنىڭ قىزمەتكەرلەرى كەرەمەت جاڭالىقتى حابارلادى. قورىق اۋماعىندا قابىلان پايدا بولدى»، - دەپ جازدى ساكەن دىلداحمەت فەيسبۋكتەگى پاراقشاسىندا.

ونىڭ جازۋىنشا، كەزىندە بۇل وڭىردە گەپاردتار تىرشىلىك ەتكەن. ال قابىلاننىڭ كەزىگۋى ءبىرىنشى رەت تىركەلىپ وتىر. ساكەن دىلداحمەتتىڭ جازۋىنشا، سۋرەت فوتوتۇزاق ارقىلى تۇسىرىلگەن.

ەسكە سالا كەتسەك، ءۇستىرتتىڭ قازاقستاندىق بولىگىندە سيرەك كەزدەسەتىن جانۋارلاردىڭ بارى دالەلدەنگەنىن بۇرىن دا حابارلاعان بولاتىنبىز. قازاقستاننىڭ بيو الۋان تۇرلىلىكتى ساقتاۋ قاۋىمداستىعىنىڭ (ق ب س ق) ەكىنشى ەكسپەديتسياسى ورتالىق ازيا شولدەرى جونىندەگى باستاما (و ا ش ب) جوباسى بويىنشا ءۇستىرتتىڭ قازاقستانداعى وڭتۇستىك بولىگىنە بارىپ، وسىنداي تۇجىرىم جاساعان.