قازاقستاندا مەكتەپتەردە قانداي تاعامدارعا تىيىم سالىنعان

استانا. قازاقپارات - مەكتەپ اسحانالارى مەن بۋفەتتەرىندە قانداي تاعامدار مەن سۋسىندارعا تىيىم سالىنعانىن استانا قالالىق قوعامدىق دەنساۋلىق ساقتاۋ دەپارتامەنتى ءمالىم ەتتى، دەپ حابارلايدى قازاقپارات.

 «مەكتەپ وقۋشىلارىنىڭ اس مازىرىنە پايدالى جانە قۇنارلى تاعامدار كىرۋى ءتيىس. كۇن سايىن تاماقتانۋ راتسيونىنا ەت، ءسۇت، وسىمدىك جانە سارى ماي، قارابيداي مەن بيداي ۇنىنان جاسالعان نان، كوكونىستەر مەن قانت كىرۋى ءتيىس. بالىق، جۇمىرتقا، ىرىمشىك، سۇزبە، قۇس ەتى ەكى- جەتى كۇندە ءبىر رەت بەرىلەدى»، - دەلىنگەن دەپارتامەنتتىڭ فەيسبۋكتەگى پاراقشاسىندا.

 مەكتەپ اسحانالارى مەن بۋفەتتەرىندە مىنا تاماقتارعا تىيىم سالىنادى: كرەمى بار كونديتەرلىك ونىمدەر، تاتتىلەر (شوكولاد، كامپيت، پەچەنە)، قايماق جانە مايونەز ارالاسقان سالاتتار، وندىرىستىك ەمەس تاماق ونىمدەرى، جىلدام پىسىرۋگە ارنالعان كونتسەنتراتتار قوسىلعان تاعامدار، ءتاتتى الكوگولسىز سۋسىندار، الكوگولسىز ەنەرگەتيكالىق سۋسىندار، فاستفۋدتار، اشى سوۋستار، كەتچۋپتارعا رۇقسات ەتىلمەيدى.

دايىن تاماقتىڭ ساپاسىن باقىلاۋدى مەكتەپتىڭ براكەراجدىق كوميسسياسى سانيتارلىق ەرەجەلەرگە ساي جۇرگىزەدى. بۇدان بولەك، كۇن سايىن مەديتسينالىق قىزمەتكەر نەمەسە جاۋاپتى تۇلعا تاماقتاردىڭ ساپاسىنا ورگانولەپتيكالىق باعالاۋ جۇرگىزۋى ءتيىس.